BAKI, 3 aprel. TELEQRAF

"Azərbaycan Uşaqları" İctimai Birliyinin sığınacağından Respublika Pediatriya Mərkəzinin nəzdində olan Nizami Uşaq Yoluxucu Xəstəlikləri Xəstəxanasına 3 uşaq hospitalizasiya olunub.

Bu barədə Teleqraf-ın sorğusuna cavab olaraq TƏBİB-dən məlumat verilib.

Bildirilib ki, martın 31-də yerləşdirilən 2019-cu il təvəllüdlü şəxsə (qadın cinsli) və aprelin 1-də yerləşdirilən 2021-ci il təvəllüdlü şəxsə (kişi cinsli) yuxarı tənəffüs yollarının dəqiqləşdirilməmiş infeksiyası diaqnozu təyin edilib. Hazırda müvafiq şöbədə müalicələri davam etdirilir, vəziyyətləri stabildir.

Aprelin 2-də yerləşdirilən 2011-ci il təvəllüdlü şəxsə (qadın cinsli) isə dəqiqləşdirilməmiş bağırsaq infeksiyası (qastroenteritik forma) diaqnozu təyin edilib. Müvafiq şöbədə müalicəsi davam etdirilən şəxsin vəziyyəti ağır qiymətləndirilir.