BAKI, 3 aprel. TELEQRAF

İkinci Şəhidlər xiyabanında Aprel döyüşləri şəhidlərinin məzarlarını ziyarət davam edir.

Teleqraf xəbər verir ki, bu gün Azərbaycanın Milli Qəhrəmanı, Silahlı Qüvvələrin polkovnik-leytenantı, Xüsusi Təyinatlı Qüvvələrin zabiti Murad Mirzəyevin məzarı ziyarət olunub.

Mərasimdə Yasamal Rayon İcra Hakimiyyətinin başçısı Elşad Həsənov, Sabirabad Rayon İcra Hakimiyyətinin nümayəndələri, şəhidin atası Telman Mirzəyev, həyat yoldaşı Fizzə Mirzəyeva, şəhidin övladları, döyüş yoldaşları iştirak ediblər.

Azərbaycanın ərazi bütövlüyü uğrunda canından keçən şəhidlərin xatirəsi bir dəqiqəlik sükutla yad edilib. Murad Mirzəyevin yaxınları onun həyat yolundan, göstərdiyi şücaət və qəhrəmanlığından danışıblar.

Qeyd edək ki, Murad Mirzəyev 1976-cı il martın 31-də Sabirabad rayonunun Muğan Gəncəli kəndində anadan olub. O, 2016-cı il Aprel döyüşlərində komandiri olduğu qrup ilə birlikdə Talış kəndi ətrafındakı yüksəklikləri düşməndən azad edib və baş verən qeyri–bərabər döyüşdə şəhid olub.

Azərbaycan Respublikasının Prezidenti İlham Əliyevin Sərəncamı ilə Murad Mirzəyev ölümündən sonra “Azərbaycanın Milli Qəhrəmanı” adına layiq görülüb.