BAKI, 3 aprel. TELEQRAF

Tovuzda anası tərəfindən tərk edilmiş 1 yaş 3 aylıq körpə yaxın günlərdə körpələr evinə təhvil veriləcək.

Bunu Teleqraf-a açıqlamasında "Azərbaycan Uşaqları" İctimai Birliyinin sədri Kəmalə Ağazadə deyib.

O bildirib ki, körpə hazırda Ə.F.Qarayev adına Uşaq Klinik Xəstəxanasındadır, müalicələri davam etdirilir, vəziyyəti stabilləşib.

"Güman edirəm ki, uşaq yaxın günlərdə körpələr evinə köçürüləcək. Anası ilə bağlı məlumatım yoxdur. Çünki onunla bağlı qərarı İcra Hakimiyyəti hazırlamalıdır. Sosial Xidmətlər Agentliyi də məsələyə öz münasibətini bildirib. Ananı məhkəmə qaydası ilə valideyn hüquqlarından məhrum etmək lazımdır. Həmçinin, qadının psixi problemləri varsa, müalicəsi istiqamətində Səhiyyə Nazirliyinə müraciət edilməlidir. Qadının kimsəsi yoxdursa, İcra Hakimiyyətinin Komissiyası tərəfindən müraciət edilməlidir və o müalicə üçün xəstəxanaya yerləşdirilməlidir", - deyə K.Ağazadə əlavə edib.

TƏBİB-dən Teleqraf-ın sorğusuna cavab olaraq bildirilib ki, aparılan müalicələrdən sonra körpənin vəziyyətində yaxşılaşma müşahidə edilib və aprelin 2-də Pediatriya şöbəsinə köçürülüb. Hazırda müalicəsi davam etdirilir, vəziyyəti stabildir.

Xatırladaq ki, Tovuz Rayon Polis Şöbəsinə kənd ərazisində yerləşən mənzillərin birində valideyni tərəfindən tənha buraxılan azyaşlının olması barədə məlumat daxil olub. Dərhal polis əməkdaşları sözügedən ünvana gediblər və orada 1 yaş 2 aylıq oğlan uşağının olmasını aşkarlayıblar.