Bakı, 2 aprel. TELEQRAF

"Ən böyük arzularından biri qızımız Betülü ilk dəfə bağça və məktəbə aparmaq idi".

Bunu Teleqraf-a açıqlamasında Aprel şəhidi, mayor pilot Urfan Vəlizadənin həyat yoldaşı Könül Vəlizadə deyib.

O, şəhid həyat yoldaşı ilə bağlı xatirələrini bölüşüb:

"Urfan elə biri idi ki, onunla yaşadığım hər gün barəsində saatlarla danışmaq olar. Daim zarafatlar edirdi. Hər zaman mənim üzümdə gülüş yaratmağa çalışırdı. Ailəsinə, uşaqlarına çox bağlı idi. Bizdən uzaqda olsa belə, gün ərzində dəfələrlə zəng vurub əhvalımı soruşurdu. Uşaqların vəziyyəti ilə maraqlanırdı. Biləndə ki, nəsə istəyirik, özü gələ bilməsə də alıb göndərirdi. Onun haqqında kimsə neqativ bir söz deyə bilməzdi. Uşaqla uşaq, böyüklə böyük idi".

K.Vəlizadə həyat yoldaşı ilə son telefon danışığı barədə də məlumat verdi:

"Urfanla son danışığım aprelin 2-də oldu. Mənə nə isə demədi. Hər zaman olduğu kimi, bu dəfə də hal-əhval tutdu, maraqlandı. Mənə dedi ki, imtahandayam. Səsindən, danışığından hiss edə bilməzdim ki, onun bizimlə son əlaqəsidir. Həmin gün anamın doğum günü idi. Mənə dedi ki, get sən öz hədiyyəni al, mən də axşam hədiyyə alıb, birbaşa ad gününə gələcəm. Amma təəssüf ki... Onun şəhid olması ilə həyatımın ən böyük zərbəsini aldım. 9 ildir aramızda yoxdur, ancaq mən onun yoxluğu ilə hələ də barışa bilməmişəm. O bizim başımıza ömürlük tac qoydu. Övladlarının, mənim, ailəsinin başını daim uca etdi".

Şəhidin həyat yoldaşı bildirib ki, U.Vəlizadənin ən böyük arzusu övladları ilə bağlı olub:

"Övladlarına, ailəsinə çox bağlı idi. Ən böyük arzusu uşaqların xoş günlərini görmək, onların yaxşı təhsil alması idi. Arzulayırdı ki, balaca qızımız Betülü özü ilk dəfə bağça və məktəbə aparsın. Bir ata üçün ən xoşbəxt günlərdən biri qızlarının toy məclisini görmək olardı. Ancaq təəssüf ki, Urfan bunları görmədi. O, qızlarımızın ailə qurduğu günü görməyəcək və bu, mənim üçün olduqca çətin, həm də ağrılıdır. Onun arzularını reallaşdırmağa çalışacağıq. Hazırda böyük qızım Zəhra 11-ci sinifdədir, universitetə qəbul olmağa hazırlaşır. Urfan şəhid olanda qızımız Betülün 1 yaşı yenicə tamam olmuşdu. Allah heç bir uşağı atasız qoymasın. Torpaqlarımızın işğaldan azad görməyi də çox istəyirdi. Şükür Allaha ki, bu gün Qarabağ azaddır və inanıram ki, Urfan sağ olsaydı, bəlkə də həmin gün onun üçün ən xoşbəxt anlarından biri olardı".