BAKI, 3 aprel. TELEQRAF

18-19 aprel tarixlərində Akademik Milli Dram Teatrında “Varlı qadın” tamaşasının premyerası keçiriləcək.

Teatrın mətbuat xidmətindən Teleqraf-a verilən məlumata görə, Əməkdar incəsənət xadimi Əli Əmirlinin eyniadlı pyesi əsasında hazırlanan səhnə əsəri Xalq artisti Firəngiz Mütəllimovanın yubileyi münasibəti ilə benefis tamaşadır.

Tamaşanın quruluşçu rejissoru Əməkdar incəsənət xadimi Bəhram Osmanov, səhnə tərtibatçısı Qabil Gözəlov, geyim üzrə rəssamı Aygün Mahmudova, musiqi tərtibatçısı Orxan Murtuzov, rejissor assistenti Xanımbacı Həsənovadır.

Tamaşada Xalq artistləri Firəngiz Mütəllimova (Həvva), Sabir Məmmədov (Sarı), aktyor Elçin Nurəliyev (Qara), əməkdar artistlər Elşən Cəbrayılov (Vəkil), Rövşən Kərimduxt (Əlvan), aktyorlar Natiq Fərzəliyev (Pəhləvan), Ramin Şıxəliyev (Dilənçi), Rada Nəsibova (Şadxəbər), Məhsəti Tahirzadə (Bədxəbər), Firuzə Balayeva (Fotoqraf), Afət Məmmədova (VAAQ müdiri), Vüsal Mustafayev və Tural İbrahimov (Cangüdənlər) çıxış edir.