BAKI, 3 aprel. TELEQRAF

"Ermənistanın son dövrlər davamlı olaraq Azərbaycanla şərti sərhəddə hərbi təxribata əl atması heç də təsadüfi proseslərin nəticəsi deyil. Görünən odur ki, çox ciddi hadisələr baş verir. Bunun fonunda hadisələrin istənilən halda nəzarətdən çıxması ehtimalı istisna edilmir".

Bu sözləri Teleqraf-a hərbi ekspert, ehtiyatda olan polkovnik Üzeyir Cəfərov şərti sərhəddə baş verən hərbi təxribatlarla bağlı mövzunu şərh edərkən deyib.

Ekspert hesab edir ki, Baş nazir Nikol Paşinyanın Ermənistan ordusuna atəşkəsin pozulmaması ilə bağlı müraciəti də növbəti hiyləgərliyin nümunəsidir: “Son günlər regional və qlobal miqyasda baş verən hadisələr fonunda Ermənistanın hərbi təxribatlarının sayının artması Azərbaycanla mümkün hərbi toqquşmanı qaçılmaz edə bilər. Görünür ki, erməni tərəfinə posesdə vaxt udmaq üçün müəyyən bəhanələr lazımdır. Çünki Azərbaycanla baş verəcək istənilən lokal toqquşma Paşinyanın vaxt qazanmasına imkan yaradır”.

O əlavə edib ki, şərti sərhəddə davam edən hərbi təxribatlara qarşı Azərbaycanın da sona qədər səbrlə yanaşması mümkün deyil: "Baş verəcək istənilən hadisə Ermənistan üçün pis nəticələnəcək. Bütün hallarda hazırda bölgədə narahatedici məqamlar çoxdur. İstənilən an hər şey baş verə bilər. Ermənistan hakimiyyətinin proseslərə nəzarət edə bilməməsi hadisələrin sonrakı inkişafı üçün yaxşı heç nə vəd etmir”.

Milli Məclisin İctimai birliklər və dini qurumlar komitəsinin sədri, deputat Fazil Mustafa isə Azərbaycanla Ermənistan arasında şərti sərhəddə hərbi təxribatın artmasının üçüncü tərəflə bağlı olduğunu bildirib.

“Baş verən hərbi təxribatlar Avropa İttifaqının şərti sərhəddə olan “missiyası”nın bilavasitə iştirakı və təhriki ilə bağlıdır. Çünki onlar bölgədə olduğunu əsaslandırmaq üçün Ermənistan tərəfindən vəziyyəti gərginləşdirməyə çalışacaqlar. Sözsüz ki, bu təxribatlara qarşı Azərbaycan hələlik təmkinlə yanaşır. Amma bu təmkini də həmişə qorumaq mümkün olmayacaq”, - o qeyd edib.

Komitə sədri təxribatların intensivləşməsi fonunda Azərbaycan tərəfindən buna qarşı sərt cavab veriləcəyini deyib: “Onlar da bu cavabı gözləməlidir. Burada əsas təxribatçı qüvvə Avropa İttifaqını təmsil edən “missiya”nın mövcudluğudur. Çox guman ki, proseslər məhz onların əli ilə qızışdırılır”.