BAKI, 4 aprel. TELEQRAF

Naxçıvan Muxtar Respublikası Səhiyyə Nazirliyi “Konstitusiya və Suverenlik İli” çərçivəsində həyata keçirdiyi yeni təşəbbüslə uşaq bağçalarına D vitamininin paylanmasına başlayıb.

Teleqraf xəbər verir ki, bu təşəbbüs, muxtar respublikada uşaqların sağlam inkişafını dəstəkləmək, onların immun sistemini gücləndirmək və vitamin çatışmazlığını aradan qaldırmaq məqsədi güdür. Layihə çərçivəsində ümumilikdə 5000 ədəd D vitamini paylanacaq.

Tədbirin açılışı Naxçıvan şəhər 8 saylı uşaq bağçasında baş tutub. Açılış mərasimində Naxçıvan MR Səhiyyə Nazirliyi və Təhsil Nazirliyinin əməkdaşları, bağça direktorları, həkimlər və valideynlər iştirak edib. Uşaqlar üçün təşkil olunan əyləncəli şou proqramı tədbirə rəng qatıb.

Zərifə Əliyeva adına Naxçıvan Şəhər Poliklinikasının həkim heyəti, muxtar respublikadakı uşaq bağçalarına tibbi müayinələr həyata keçirəcək, valideynlərə maarifləndirici söhbətlər aparacaq və D vitamini paylanılmasını davam etdirəcək. Bu xeyriyyə aksiyası, uşaqların sağlamlığını qorumaq və gələcək nəsilin rifahını təmin etmək baxımından mühüm bir addım olaraq diqqətə layiqdir.