BAKI, 2 aprel. TELEQRAF

"Azərbaycan Xalq Cəbhəsi Partiyasının (AXCP) aprelin 1-də Mərkəzi Seçki Komissiyasına (MSK) hesabat təqdim etməməsi fərqli səbəblərlə bağlıdır. Bu, partiyadan irəli gələn bir məsələ deyil".

Bu sözləri Teleqraf-a Azərbaycan Xalq Cəbhəsi Partiyasının (AXCP) sədr müavini Seymur Həzi deyib.

O qeyd edib ki, AXCP qurultay keçirmədiyinə görə, biz tələb olunan sənədləri aidiyyəti üzrə təqdim edə bilmirik: “Qurultayda partiyanın nizamnaməsi və strukturları yenilənməlidir. Bununla bağlı partiya olaraq hökumətə 6 aya yaxın olar müraciət ünvalamışıq. Məhz partiyanın qurultayı keçirildikdən sonra qəbul ediləcək qərarlara əsasən, müvafiq sənədlər təqdim olunacaq. Problem sırf bununla bağlıdır”.

S.Həzi deyib ki, prosedura görə, Ədliyyə Nazirliyi partiyaların nizamnamə sənədlərini yeniləməklə bağlı tələb irəli sürüb.

AXCP də bu sənədləri ancaq qurultay vasitəsi ilə yeniləyə bilər. Qurultay keçirildikdən sonra biz partiyanın hesabatlarını və tələb edilən digər sənədləri MSK-ya və aidiyyatı strukturlara təqdim edəcəyik”, - sədr müavini bildirib.

Qeyd edək ki, Azərbaycanda dövlət qeydiyyatında olan 26 partiyadan 25-i 2024-cü il üzrə maliyyə hesabatını MSK-yə təqdim edib. Qanunvericiliyə əsasən, siyasi partiyalar illik maliyyə hesabatlarını auditor rəyi ilə birlikdə hər il aprel ayının 1-dən gec olmayaraq, Mərkəzi Seçki Komissiyasına təqdim etməlidirlər.

Mərkəzi Seçki Komissiyası aprelin 1-dək illik maliyyə hesabatlarını auditor rəyi ilə birlikdə təqdim etməyən siyasi partiyalar barədə Ədliyyə Nazirliyinə məlumat verməlidir.