BAKI, 1 aprel. TELEQRAF

Bu yay Kanada, ABŞ və Meksikada keçiriləcək dünya çempionatında iştirak edəcək 48 komandanın adı artıq bəllidir.

Teleqraf xəbər verir ki, bu mundialdan İtaliya kimi nəhəng komandalarla yanaşı, karyerasını başa vurmaq ərəfəsində olan bir sıra ulduz futbolçular da kənarda qalacaq.

DÇ-2026-ya vəsiqə qazana bilməyən məşhur altı futbolçuya nəzər salaq:

Canluici Donnarumma (“Mançester Siti” və İtaliya)

Canluici Donnarumma ötən mövsüm PSJ ilə Çempionlar Liqasını qazandıqdan sonra sentyabrda “Mançester Siti”yə keçib. 27 yaşlı qolkiper cari mövsüm Premyer Liqanın ən yaxşı qapıçılarından biri olub. Donnarumma İtaliyanın AVRO-2020-də çempion olduğu turnirin ən yaxşı oyunçusu seçilmişdi.

Buna baxmayaraq, İtaliya pley-off mərhələsində Bosniya və Herseqovinaya penaltilər seriyasında 1:4 hesabı ilə uduzaraq ardıcıl üçüncü dəfə dünya çempionatından kənarda qalıb.

Xviça Kvaratsxeliya (PSJ və Gürcüstan)

Xviça Kvaratsxeliya ötən mövsüm PSJ-nin Avropa çempionu olmasına kömək edib və “İnter”ə qarşı 5:0 hesablı final qələbəsində qol vurub. O, həmçinin 2025-ci il “Qızıl top” səsverməsində 12-ci yeri tutub.

Lakin Gürcüstan millisi seçmə mərhələdə uğursuz çıxış edib və İspaniya, Türkiyə və Bolqarıstanın yer aldığı qrupda cəmi 3 xal toplayaraq qrupda sonuncu olub.

Robert Levandovski (“Barselona” və Polşa)

Son 15 ilin ən böyük hücumçularından biri, Polşa millisinin kapitanı Robert Levandovski 2026-cı il dünya çempionatında çıxış etməyəcək böyük adlar sırasındadır. Milli komandada 89 qol vuran 37 yaşlı hücumçu karyerasında son böyük beynəlxalq turnirini artıq keçirmiş ola bilər. O, 2026 seçmə mərhələsində G qrupunda 4 qol vurub. Buna baxmayaraq, Polşa Niderlanddan 3 xal geri qalaraq qrupda geri düşüb və komandası Stokholmda İsveçə qarşı keçirilən pley-off-un finalında 2:3 hesabı ilə uduzaraq turnirdə mübarizəni dayandırıb.

Viktor Osimhen (“Qalatasaray” və Nigeriya)

Viktor Osimhen 2023-cü ildə “Napoli” ilə A Seriyasını qazandıqdan sonra “Qalatasaray”a keçib və ötən mövsüm 30 oyunda 26 qol vuraraq komandasını Türkiyə çempionluğuna daşıyıb.

Nigeriya seçmə mərhələnin ilk qrupunda 10 oyunun 5-də heç-heçə edib və lider Cənubi Afrikadan 1 xal geri qalıb. Komanda pley-offda ikinci şans qazansa da, Nigeriya Konqoya penaltilər seriyasında uduzub.

Seru Girassi (“Borussiya Dortmund” və Qvineya)

Seru Girassi son üç mövsümdə Bundesliqada vurduğu 62 qolla Avropanın ən məhsuldar hücumçularından biri sayılır. 2024-2025 mövsümündə Çempionlar Liqasında heç kim ondan çox qol (13) vurmayıb. Buna baxmayaraq, Qvineya millisi Afrika seçmə mərhələsinin ilk raundunda qrupunu 4-cü pillədə başa vurduğu üçün o, dünya çempionatında iştirak etməyəcək.

Dominik Soboslai (“Liverpul” və Macarıstan)

“Liverpul” və Macarıstan millisinin yarımmüdafiəçisi Dominik Soboslai bu mövsüm uğurlu çıxış etsə də, dünya çempionatında olmayacaq. Belə ki, həlledici görüşdə İrlandiya əlavə vaxtda 3:2 hesabı ilə qalib gələrək pley-offa yüksəlib və Macarıstanı mübarizədən kənarlaşdırıb.