BAKI, 15 yanvar. TELEQRAF

"Qarabağ"ın UEFA Çempionlar Liqasında Almaniyanın "Ayntraxt Frankfurt" klubu ilə keçiriləcək oyunu üçün biletlər rəsmi olaraq satışa çıxmasa da, bəzi xarici saytlarda artıq bunu əldə edilməsi ilə bağlı elanlar paylaşılıb.

Teleqraf-ın araşdırmasına görə, elanlarda biletlər qonaq sektor üçün deyil, yerli azarkeşlər üçün nəzərdə tutulan sektorlar üzrə təklif olunur.

Xatırladaq ki, Bundesliqa təmsilçisi UEFA tərəfindən cəzalandırıldığı üçün Bakıdakı oyunda azarkeş dəstəyindən məhrum olacaq. Yəni, "Ayntraxt Frankfurt" tərəfdarları üçün yer ayrılmayacaq və qonaq sektorun biletləri də "Qarabağ" azarkeşlərinə satılacaq.

Digər vacib məqam isə xarici saytlarda satışa çıxarıldığı bildirilən biletlərin qiymətinin həddindən artıq baha olmasıdır. Müqayisə üçün qeyd edək ki, Bakıda "Ayaks"la (Niderland) keçirilən son ev oyununda standart biletlərin qiyməti 10-75 manat aralığında idi. Xarici saytlarda isə biletlərin qiyməti 80 dollardan (136 manat) başlayır.

Xarici bilet satışı platformalardakı görüntüləri təqdim edirik:

Məsələ ilə bağlı Teleqraf-a açıqlama verən "Qarabağ"ın mətbuat xidmətinin rəhbəri Anar Hacıyev isə bunu deyib: "Qarabağ"ın oyununa biletlərin satışı yalnız "iTicket.az" saytı vasitəsi ilə həyata keçirilir. Biletlərin yaxın günlərdə satışa çıxaracağı gözlənilir. Bu barədə klubun rəsmi saytı və sosial şəbəkə hesabları vasitəsi ilə məlumat veriləcək. Xarici saytlarda yerləşdirilən elanlar isə etibarlı deyil".

Əməkdaşımız "X" platformasında elan yerləşdirilən bir neçə şəxslə əlaqə saxlayıb. Bu kimi elanı paylaşan şəxslər əməkdaşımıza bileti əldə etmək üçün bank hesabı göndərib.

Maraq üçün onu da bildirək ki, "Qarabağ"ın Çempionlar Liqasındakı Bakıda keçirilən oyunlarına maraq həddindən artıq çox olduğundan biletlər satışa çıxarıldığı andan tez bir zamanda tükənir. Bəzi işbazlar biletləri ucuz qiymətə alaraq, oyun gününə yaxın daha baha qiymətə satırlar.

Bununla bağlı Daxili İşlər Nazirliyi də ciddi tədbirlər görür, hətta məsuliyyətə cəlb edilənlər də var.