BAKI, 5 aprel. TELEQRAF
“Turan Tovuz” komandasının ayağı sınan futbolçusu Denis Marandiçi bərpa prosesi üçün aprelin 10-dan sonra Bakıya gələcək.
Bu barədə Teleqraf-a Tovuz klubunun mətbuat xidmətinin rəhbəri Süleyman Tağıyev məlumat verib.
Klub rəsmisi hazırda Portuqaliyada müalicə alan 29 yaşlı müdafiəçinin Azərbaycana qayıtdıqdan sonra fərdi məşqlərə başlayacağını deyib.
Tağıyev yalnız bundan sonra moldovalı oyunçunun yaşıl meydanlara qayıdış tarixinin dəqiqləşəcəyini qeyd edib: “Denisin müalicəsi 3 mərhələdən ibarət idi: əməliyat sonrası, terapiya və bərpa. Yaxın günlərdə o, ikinci mərhələni başa vurub Azərbaycana gələcək və bərpa prosesini burada keçəcək. Marandiçi üçüncü mərhələyə aprelin 20-dən sonra başlamalıdır. Futbolçu rəhbərlik, məşqçi və həkim heyəti ilə əlaqədədir. Fiziki durumuna uyğun olaraq, son qərar aprelin 20-dən sonra veriləcək. Ondan sonra fərdi qaçışlara da başlamalıdır. Son durumunu dəqiqləşdirib qərar veriləcək”.
Qeyd edək ki, Denis Marandiçi dekabrın 3-də "Sabah" komandasına qarşı Azərbaycan Kubokunun 1/8 final mərhələsinin oyununda zədələnib. Rəqib futbolçu Pavol Şafrankonun zərbəsindən sonra onun ayağı qırılıb. Marandiçi Tovuz şəhər stadionundan birbaşa xəstəxanaya aparılıb, daha sonra əməliyyat olunub.
