BAKI, 2 aprel. TELEQRAF

Futbol üzrə Azərbaycan Kubokunda yarımfinal mərhələsinin ilk oyunu keçirilib.

Teleqraf xəbər verir ki, "Liv Bona Dea Arena"da "Araz-Naxçıvan" və "Qarabağ" komandaları üz-üzə gəlib.

Görüş meydan sahiblərinin qələbəsi ilə yekunlaşıb - 1:0.

24-cü dəqiqədə Ağdam komandasının əlcəzairli legioneri Yassin Benzia topu uzaqlaşdırmaq istədiyi vaxt Naxçıvan təmsilçisinin futbolçusu İssuf Paronun ayağına zərbə endirib. Burkina-fasolu müdafiəçi zərbədən yerə yıxılıb və həkimlər ona ilkin yardım göstərib. Baş hakim Elçin Məsiyev VAR-ın müdaxiləsindən sonra epizodun təkrarına baxıb və penalti qərarı verib.

Penaltini dəqiq yerinə yetirən Felipe Santos hesabı açıb. Bu qol 28-ci dəqiqəyə təsadüf edib.

"Araz-Naxçıvan"ın ən məhsuldar oyunçusu 83-cü dəqiqədə zədələnərək, meydanı tərk edib. Onu Vadim Abdullayev əvəzləyib.

Beləliklə, "Araz-Naxçıvan" bu mövsüm ilk dəfə "Qarabağ"a qalib gəlib. İki komanda arasındakı Azərbaycan Premyer Liqasında keçirilmiş ilk 3 oyunun hamısında Ağdam təmsilçisi qələbə qazanmışdı - 4:1, 2:0, 3:1.

Daha bir yarımfinal görüşü bu gün "Neftçi" və "Sabah" komandaları arasında keçiriləcək. Oyun saat 19:30-da başlanacaq.

Cavab görüşləri isə aprelin 23-də olacaq.