BAKI, 3 aprel. TELEQRAF

Bu gün Azərbaycanın Milli Qəhrəmanı, Silahlı Qüvvələrin polkovnik-leytenantı, Xüsusi Təyinatlı Qüvvələrin zabiti Murad Mirzəyevin vəfatından 9 il ötür.

Teleqraf -ın əməkdaşı Milli Qəhrəmanın həyat yoldaşı Fizzə Mirzəyeva ilə həmsöhbət olub:

“Şəhid olmazdan öncə Murad mənim üçün qəhrəman idi. Həyat yoldaşı, övladlarının atası kimi bizim qəhrəmanımız idi. Şəhid olduqdan sonra gördüm ki, Murad Mirzəyev tək bizim deyil, Azərbaycanın, millətin qəhrəmanıdır. Zahirən zəhmli birinə bənzəsə də, əslində çox mülayim, qayğıkeş insan idi. Onun həyatı işi və ailəsindən ibarət idi. Bacardığı qədər bizimlə vaxt keçirməyə çalışırdı.

Murad həmçinin çox təmkinli, sadə insanıydı. Övladları ilə bağlı arzuları vardı. Təəssüf ki, arzuları yarımçıq qaldı. Evimizdə heç vaxt hiss etmirdik ki, o xüsusi təyinatlıdır. Evdə iş barəsində danışmazdı. O, son dəfə martın 28-si evdən çıxıb. Novruz bayramında valideynləri bizə gəlmişdi, onlarla birlikdə xoş gün keçirdik. Amma nə bilərdik ki, bu, bizim birlikdə keçirdiyimiz sonuncu xoşbəxt anlardır. Evdən çıxanda övladlarını qucaqlayıb, bağrına basdı”.

"Səhərə yaxın şəhid oldu"

Fizzə xanım Murad Mirzəyevlə sonuncu telefon danışıqlarından da söz açıb:

“Onunla sonuncu danışığımız aprelin 2-si olub. Sosial şəbəkələrdə döyüşlərin getdiyi ilə bağlı məlumatlar yayılmışdı. Mən ondan soruşdum ki, bu xəbərlər doğrudurmu? Dedi ki, narahat olma, hər şey yaxşıdır. Aprelin 2-dən 3-nə keçən gecə şiddətli döyüşlərdə iştirak edib, səhərə yaxın isə şəhid olmuşdu.

O, çox vətənpərvər idi. Onun doğum günü martın 31-dir, amma o, bu günü qeyd etməzdi. Deyirdi, bu gün azərbaycanlılara qarşı soyqırımı törədilib, mən necə şənlənim?

"Həyatımı Muradla bölüşdüyüm üçün xoşbəxtəm"

Murad peşəkar hərbçi, zabit idi. 2005-2007-ci illərdə ABŞ-nin Virciniya ştatında ingilis dili və xüsusi təyinatlar üçün nəzərdə tutulmuş “Ranger” kursunda iştirak etmişdi. Türkiyədə “Kara Harp Okulu”nda yüksək səviyyədə təhsil almışdı. Onun hərbçi kimi formalaşmasında bu məktəbin çox böyük rolu var idi.

O, 9 ildir aramızda yoxdur, bunu düşünəndə təəccüblənirəm. Mən elə bilirəm ki, 2016-cı ildəyəm və heç nə dəyişməyib. Muradın həm həyat yoldaşı, həm ata kimi, həm də zabit kimi yeri hər zaman görünür. Həyatımı onunla bölüşdüyüm üçün xoşbəxtəm və bununla fəxr edirəm”.

Xatırladaq ki, Murad Mirzəyev 1976-cı ilin martın 31-də Sabirabad rayonunun Muğan Gəncəli kəndində anadan olub. Hələ uşaq yaşlarında hərbçi olmağa can atan Mirzəyev Cəmşid Naxçıvanski adına Hərbi Liseyə qəbul olub. 1991–1994-cü illərdə bu hərbi liseydə təhsil alan Murad Mirzəyev daha sonra təhsilini Türkiyədə davam etdirib və 1998-ci ildə ali hərbi məktəbi bitirib.

Murad Mirzəyev ABŞ, Rumıniya və İordaniyada hərbi təlimlərdə iştirak edib. O, Amerikada “Ranger” kursunu bitirdikdən sonra Vətənə qayıdıb və Gəncə şəhərində "N" saylı hərbi hissələrin birində hərbi xidmətə başlayıb. Sonralar isə Xüsusi Təyinatlı Qüvvələrin zabiti olub. Xidmətə başlamasının 10-cu ilində Murad Mirzəyev "Qüsursuz xidmətə görə", “Azərbaycan Respublikası Silahlı Qüvvələrinin 90 illiyi (1918–2008)", "Azərbaycan Respublikası Silahlı Qüvvələrinin 95 illiyi (1918–2013)" yubiley medalları və "Qızıl Ulduz" medalı ilə təltif olunub.

O, 2016-cı il Aprel döyüşlərində komandiri olduğu qrup ilə birlikdə Talış kəndi ətrafındakı yüksəklikləri düşməndən azad edib və baş verən qeyri–bərabər döyüşdə şəhid olub. Azərbaycan Respublikasının Prezidenti İlham Əliyevin Sərəncamı ilə Murad Mirzəyev ölümündən sonra “Azərbaycanın Milli Qəhrəmanı” adına layiq görülüb.