BAKI, 3 aprel. TELEQRAF

FIFA yığma komandaların 2025-ci ildə ilk reytinq cədvəlini açıqlayıb.

Teleqraf xəbər verir ki, Azərbaycan yığması ötən siyahı ilə müqayisədə 2 pillə geriləyib.

Baş məşqçi Fernandu Santuşun rəhbərlik etdiyi kollektiv 1160,64 xalla 119-cu sıraya enib.

Siyahıya 1886,16 xalla Argentina başçılıq edir. İspaniya 1854,64 xalla ikinci, Fransa 1852,71 xalla üçüncü pillədə qərarlaşıb.

Azərbaycan millisinin 2026-cı il dünya çempionatının seçmə qrup mərhələsindəki rəqiblərindən olan Fransa bir pillə geriləyib. Digər rəqiblərə gəlincə, Ukrayna 1559,81 xalla 25-ci pillədə qalıbsa, 1336,55 xala malik İslandiya 4 pillə geriləyərək, 74-cü mövqeyə enib.

Türkiyə millisi 1551,47 xalla 1 pillə irəliləyib və 27-ci yerə yüksəlib.

Qeyd edək ki, Azərbaycan yığması martda iki yoldaşlıq oyunu keçirib. Milli Haitiyə 0:3, Belarusa 0:2 hesabı ilə məğlub olub. Haiti bu qələbə sayəsində 3 pillə irəliləyərək, 1291,53 xalla 83-cü yerdə qərarlaşıb. Belarus 1235,36 xalla 98-ci pillədə qalıb.