ABŞ Ədliyyə Nazirliyi amerikalı maliyyəçi Ceffri Epşteynin yetkinlik yaşına çatmayanlara qarşı cinsi istismar işi ilə potensial əlaqəsi olan yeni sənədlər əldə edib.
Teleqraf xəbər verir ki, bu barədə qurum bəyənat yayıb.
Açıqlamada bildirilib ki, materialların yoxlanılması və ictimaiyyətə açıqlanması üçün bir neçə həftə vaxt tələb olunacaq.
Nazirliyin məlumatına görə, Nyu-York ştatının Cənub dairəsinin prokurorluğu və FTB Ədliyyə Nazirliyini Epşteyn işi ilə bağlı bir milyondan artıq yeni sənədin aşkar edilməsi barədə məlumatlandırıb. Həmin sənədlər artıq nazirliyə təqdim olunub və qanunvericiliyin tələblərinə uyğun şəkildə yoxlanılır.
Açıqlamada vurğulanıb ki, Ədliyyə Nazirliyinin hüquqşünasları sənədləri günün 24 saatı ərzində nəzərdən keçirir və Epşteynin qurbanlarının qorunması məqsədilə qanunla tələb olunan düzəlişləri aparır. Nazirlik sənədlərin mümkün qədər tez dərc ediləcəyini, lakin materialların həcminin böyük olması səbəbindən prosesin bir neçə həftə çəkə biləcəyini bildirib.
Qeyd edilib ki, yeni sənədlərin məzmunu ilə bağlı əlavə detallar açıqlanmayıb.
