BAKI, 18 may. TELEQRAF

“Ümumdünya Şəhərsalma Forumu (WUF13) kimi platformalar hökumətlərə və tərəfdaşlara bir-birindən öyrənməyə, müxtəlif milli və yerli kontekstlərə uyğunlaşdırıla bilən praktik həllər müəyyən etməyə imkan yaradır”.

Teleqraf xəbər verir ki, bu barədə Malayziyanın mənzil tikintisi və yerli özünüidarəetmə naziri, BMT-nin Məskunlaşma Proqramı (UN-Habitat) Assambleyasının fəaliyyətdə olan prezidenti Nqa Kor Minq Bakıda Ümumdünya Şəhərsalma Forumunun 13-cü sessiyasının (WUF13) açılış mərasiminə həsr olunmuş mətbuat konfransında bildirib.

N.K.Minq qeyd edib ki, urbanizasiya cəmiyyətləri sürətlə dəyişdiyi üçün şəhərlər iqtisadi imkanlarla yanaşı, mənzil təzyiqi, iqlim problemləri və sosial bərabərsizliklərlə də üz-üzədir:

“Şəhər sadəcə binalar toplusu deyil, insan hekayələrinin toplusudur. Xüsusilə həssas icmalar üçün münasib mənzilə çıxış ən təcili məsələlərdən biridir. Məhz buna görə builki forumun mövzusu xüsusilə aktualdır. Texnologiya məlumatı geniş miqyasda dəyişdirə bilər, lakin icma qurmaq üçün lazım olan etimadı və müdrikliyi eyni şəkildə genişləndirə bilməz”.

Assambleya prezidenti həftə ərzində aparılacaq müzakirələrin şəhərləri daha inklüziv və dayanıqlı etmək üçün praktik yanaşmalara fokuslanacağını vurğulayıb:

“Mənzil siyasətləri və maliyyələşmə ilə bağlı mühüm fikir mübadilələri gözləyirik. Ümumi bəyanatlardan konkret və ölçülə bilən nəticələrə keçmək həyati əhəmiyyət daşıyır. Bu proses beynəlxalq əməkdaşlığı gücləndirmək və dayanıqlı urbanizasiya ətrafında siyasi dinamikanı qorumaq üçün mühüm fürsətdir”.