BAKI, 11 aprel. TELEQRAF

Səhiyyə Nazirliyi Analitik Ekspertiza Mərkəzi əczaçılara xəbərdarlıq etdi.

Teleqraf xəbər verir ki, bu barədə AEM məlumat yayıb.

Bildirilib ki, bir müddət əvvəl sosial şəbəkələr vasitəsi ilə bəzi aptek təşkilatlarının əməkdaşlarına əczaçılıq şirkətləri tərəfindən aşağıdakı məzmunda xəbərdarlıq göndərilir:

" «Hörmətli Əczaçılar!

Bir məlumatı nəzərinizə çatdırmaq istəyirik.

Bildiyiniz kimi, "Tək kodein" və "Fenobarbıtal" tərkibli dərman preparatlarının satışı resept əsasında həyata keçirilir.

Lakin, bu maddələr mürəkkəb tərkibli dərman preparatlarının tərkibində nəzarətdə saxlanılmır! Yəni, bir dərman preparatının tərkibində, "kodein" və "fenobarbıtal"-dan başqa, misal üçün, kofein, naproksen, metamizol natrium (analgin) və s. varsa, bu cür dərman preparatlarının satışı sərbəstdir və reseptə ehtiyac olmur.

“NƏZARƏTDƏ SAXLANILMIR” dedikdə nəzərdə tutulan məqam məhz budur. Yəni, mürəkkəb tərkibli dərmanların satışında (tərkibində bu maddələr olsa belə) reseptə ehtiyac yoxdur.

Məlumatı sizlərlə bölüşdük ki, gəzən şayiələr və dezinformasiyalara aldanmayasınız.

Uğurlar!» "

Səhiyyə Nazirliyi Analitik Ekspertiza Mərkəzi qaldırılan məsələni araşdırıb.

Bildirilib ki, bəzi mürəkkəb dərman vasitələrinin tərkibinə kompleks müalicənin aparılması məqsədilə müəyyən faiz nisbətində narkotik vasitələr və psixotrop maddələr daxil edilir. Belə ki, kodein (narkotik vasitə) və fenobarbital (psixotrop maddə) bu kimi dərman maddələrinə misal göstərilə bilər. Onların qanuni tibbi istifadəsi, miqdarı, sui-istifadə edilmə ehtimalı və həmin maddələrin asanlıqla bərpa oluna bilməyəcəyi (dərman vasitələrinin tərkibindən çıxarılması) səbəbindən müvafiq Beynəlxalq Konvensiyalar ilə nəzərdə tutulan bəzi nəzarət tədbirlərindən azad edilib. “Nəzarətdə saxlanılmır” anlayışı da məhz buradan gəlir. Digər hər hansı bir nüansla, xüsusilə reseptlə əlaqəsi yoxdur.

Həmçinin, “Azərbaycan Respublikasının ərazisində dövriyyəsi qadağan edilmiş, məhdudlaşdırılmış və nəzarət edilən narkotik vasitələrin, psixotrop maddələrin, habelə Azərbaycan Respublikasının ərazisində idxalına, ixracına, tranzit nəql edilməsinə və istehsalına lisenziya tələb olunan prekursorların siyahılarının təsdiq edilməsi haqqında” Azərbaycan Respublikasının 2005-ci il 28 iyun tarixli 960-IIQ saylı Qanununa görə, kodein ölkə ərazisində dövriyyəsi məhdudlaşdırılan narkotik vasitələrin, fenobarbital dövriyyəsinə nəzarət edilən psixotrop maddələrin siyahısına daxil edilib, lakin başqa mürəkkəb tərkibli dərman preparatlarının tərkibində nəzarət tədbirlərindən azad edilib. Bu nəzarət tədbirlərindən azad olunmaya onların reseptsiz buraxılması deyil, həmin maddələrin dövriyyəsi üçün DİN-dən xüsusi icazənin alınması, miqdari hesabatlarının aparılması, saxlanılması, istifadəsi və dövriyyəsi ilə bağlı digər əməliyyatların həyata keçirilməsi aid edilib.

Hər bir dərman vasitəsinin içlik vərəqəsində onun buraxılma qaydası qeyd olunur və həmin içlik vərəqələri Azərbaycan Respublikası Səhiyyə Nazirliyinin Farmakoloji və Farmakopeya Ekspert Şurası tərəfindən təsdiqlənir. Dərman vasitəsinin buraxılma qaydasını bu və ya digər məlumatlarla ümumiləşdirmək yolverilməzdir.

Bir daha xatırladılıb ki, bu günə olan məlumata görə, hazırda Azərbaycan Respublikasının ərazisində 21 ticari adda mürəkkəb tərkibli (tərkibində narkotik və psixotrop maddələr olan) dərman vasitələri dövlət qeydiyyatına alınıb. Onlardan səkkizi həkim resepti əsasında buraxılır.

Dərmanlar:

Korvalol (Daxilə qəbul üçün damcı 25 ml məhlul, tünd rəngli şüşə flakon-damcıladıcıda №1, karton qutuqablaşmada – reseptsiz),

Qluferal (Tabletlər №20 (2×10), blisterdə, karton qutu qablaşmada – reseptlə),

Pentalgin®-N (Tabletlər №10 (1×10), konturlu-yuvalı qablaşmada, karton qutuda – reseptlə),

Valokordin® (Daxilə qəbul edilən damcı 20 ml, 50 ml qəhvəyi şüşə flakonda №1, karton qutu qablaşmada – reseptsiz),

Korvalol (Oral damcı 25 ml flakonda №1, karton qutu qablaşmada – reseptsiz),

Piralgin Neo (Tabletlər №10 (1×10), №20 (2×10), №1500 (150×10) (stasionarlar üçün) konturlu-yuvalı qablaşmada, karton qutuda – reseptlə),

Fenobarbital İTX (Tabletlər №50 (5×10) blisterdə, karton qutu qablaşmada – reseptlə),

Korvalol (Tabletlər №10 (1×10), №30 (3×10), №50 (5×10) PVX/ALÜ blisterlərdə, karton qutu qablaşmada – reseptsiz),

Korvalol (Oral damcı 25 ml, narıncı rəngli şüşə flakon-damcıladıcıda №1, karton qutu qablaşmada – reseptsiz),

Bellerqamin® (Örtüklü tabletlər №20 (1×20) PVX/alüminium folqalı blisterlərdə, karton qutu qablaşmada – reseptlə),

Kaffetin (Tabletlər №12 (2×6), stripdə, karton qutu qablaşmada – reseptsiz),

Paraferin (Kapsullar №20, №30 blisterdə, karton qutu qablaşmada

– reseptsiz),

Kodelak® (Tabletlər №10 (1×10) polivinilxlorid plyonkadan və çap olunmuş laklı alüminium folqadan hazırlanmış konturlu-yuvalı qablaşdırmada, karton qutuda – reseptlə),

Kodefrin (Şərbət 115 ml, şüşə və ya PET flakonda №1, karton qutu qablaşmada – reseptlə),

Parakod İC (Tabletlər №10 (1×10) blisterdə, karton qutu qablaşmada – reseptlə),

Kaffetin KOLD (Örtüklü tabletlər №10 (1×10), blisterdə, karton qutu qablaşmada – – reseptsiz),

Daleron Kold3 (Örtüklü tabletlər №12 (1×12), №24 (2×12) blisterdə, karton qutu qablaşmada – reseptsiz),

Medotuks (Daxilə qəbul olunan məhlul 100 ml, 150 ml, 200 ml, qəhvəyi rəngli şüşə flakonda №1, ölçü qaşığı ilə birlikdə karton qutu qablaşmada – reseptlə).

Qeyd edilib ki, qalan 3 ticari adda dərman vasitəsinin isə apteklərdə satışına icazə yoxdur. Onlar yalnız əməliyyat zamanı klinikalara xüsusi icazə ilə verilir.