BAKI, 17 aprel. TELEQRAF

Avropa İttifaqı (Aİ) ötən ilin oktyabrından bu ilin martınadək 62,7 milyard kubmetr mayeləşdirilmiş təbii qaz (LNG) idxal edərək, bu dövr üçün tarixdəki üçüncü ən yüksək göstəricini qeydə alıb.

Teleqraf xəbər verir ki, bu barədə Avropa Qaz İnfrastrukturu Təşkilatı (GIE) məlumat yayıb.

Məlumata görə, aprel ayında da LNG idxalı rekord səviyyədə davam edib. Mart ayında qeydə alınan 12,7 milyard kubmetrlik idxal həcmi aşılaraq yeni göstərici müəyyənləşib. Hazırda Avropa LNG terminallarının yenidənqazlaşdırma güclərinin 52%-i ilə işləyir. Aprel ayının əvvəlindən bu yana idxal edilən LNG-nin həcmi ötən ilin eyni dövrü ilə müqayisədə 22% çoxdur.

Bununla yanaşı, yeraltı qaz anbarlarındakı (UGS) ehtiyatların səviyyəsi ötən ilə nisbətən 42% azalıb. Aprelin 15-nə olan məlumata görə, Aİ ölkələrində anbarlara vurulan qaz həcmi 242 milyon kubmetr təşkil edib. Həmin gün ərzində anbarlardan çıxarılan qaz isə 69 milyon kubmetrə çatıb. Aprel ayı üzrə seçim göstəricisi ötən ilə nisbətən 49% yüksək, inyeksiya isə 20% aşağıdır.

Qeyd edək ki, hazırda Avropanın yeraltı qaz anbarları 35,96% doludur. Bu göstərici ötən ilin eyni dövründə 62,1% idi. Bu isə son beş ilin orta göstəricisindən 10,84 faiz bəndi azdır. Avropa Komissiyasının qərarına əsasən, üzv dövlətlər hər il noyabrın 1-dək UGS-lərdə 90%-lik doluluq səviyyəsinə çatmalıdır. Bu tələbin yerinə yetirilməsi üçün cari mövsümdə ən azı 61 milyard kubmetr qaz vurulmalıdır. Bu isə ötən ilin göstəricisindən demək olar ki, 50% çoxdur.