"Qızımın nəşi hələ Azərbaycana gətirilməyib. Bu gün ya axşam, ya da sabah səhər saatlarında gətiriləcək".

Bu sözləri Teleqraf.com-a açıqlamasında AZAL-ın qəzaya uğrayan təyyarəsinin həlak olmuş ekipaj üzvü Hökümə Əliyevanın atası Cəlil Əliyev deyib.

"Qızım Prezident İlham Əliyevin göstərişi ilə ll Fəxri xiyabanda dəfn ediləcək. Bu haqda bizə Nazirlər Kabinetindən məlumat verildi", - deyə bildirib.

***

Qazaxıstanın Aktau şəhərində qəzaya uğrayan Azərbaycam Hava Yollarına (AZAL) məxsus təyyarədə həlak olan stüardessa Hökümə Əliyevanın dəfn ediləcəyi yer bəlli olub.

Teleqraf.com-un Qərb bürosu xəbər verir ki, mərhumun Göygöl rayonunun Molla Cəlilli kəndində torpağa tapşırılacağı gözlənilir.

Həmin məzarlıqda Kəlbəcər rayonundan olan xeyli məcburi köçkün dəfn edilib. Ona görə də ailəsi H.Əliyevanı Molla Cəlilli kəndinin qəbiristanlığında torpağa tapşırmaq qərarına gəlib.

Yaxınları hazırda Hökümənin cənazəsinin Azərbaycana gətirilməsini gözləyirlər. Mərhumun atası Cəlil Əliyev Bakı şəhərindədir.

H.Əliyevanın ailəsinin yaşadığı evə isə insan axını var. Xəbəri eşidənlər mərhumun ata evini ziyarət edir, ailə üzvlərinə mənəvi dəstək olurlar.

Qeyd edək ki, dekabrın 25-də Bakıdan Qroznıya uçan Azərbaycam Hava Yollarına (AZAL) məxsus “Embrarer 190” tipli sərnişin təyyarəsi Qazaxıstanın Aktau şəhərindən bir neçə kilometr aralıda qəzaya uğrayıb. Hava gəmisində Azərbaycan, Rusiya, Qırğızıstan və Qazaxıstandan olan 62 sərnişin, həmçinin 5 ekipaj üzvü olub. Qəza nəticəsində 38 nəfər həlak olub, 29 nəfər, o cümlədən 2 ekipaj üzvü sağ qalıb. Yaralılardan bəzilərinin vəziyyəti ağırdır.

Hadisənin ilk günündən təyyarənin Rusiya hava hücumundan müdafiə qüvvələri tərəfindən vurulduğuna dair xəbərlər yayılırdı. Dekabrın 26-da bu versiya özü təsdiqini tapıb. İstintaqın ilkin nəticələrinə əsasən müəyyən edilib ki, Bakı-Qroznı marşrutu ilə hərəkət edən AZAL təyyarəsi Qroznı şəhərinə yaxınlaşarkən Rusiyanın “Pantsir-S” hava hücumundan müdafiə sistemindən istifadə edilməklə hücuma məruz qalıb. Üstəlik, Rusiya tərəfinin elektron döyüş sistemlərindən istifadə etməsi nəticəsində Azərbaycan təyyarəsinin rabitə sistemi tamamilə iflic vəziyyətinə düşüb. Məhz bu duruma görə təyyarə Rusiya aviasiya məkanında radarlardan itib, yalnız Xəzər dənizi hövzəsində görünüb.

AZAL-a məxsus təyyarənin qəzaya uğraması ilə bağlı Azərbaycan və Qazaxıstanda cinayət işi açılıb. Hər iki ölkənin hökumətləri təyyarə qəzasının səbəblərini araşdırmaq üçün komissiyalar yaradıb. Sahə tədqiqatları Azərbaycanın aviasiya administrasiyası ilə əməkdaşlıq çərçivəsində aparılır.