BAKI, 5 aprel. TELEQRAF

Beynəlxalq Hakimlər Assosiasiyasının 67-ci Baş Assambleyası Bakıda keçiriləcək

Teleqraf-ın xəbərinə görə, 2025-ci ilin 11-17 oktyabr tarixlərində Bakı şəhərində keçiriləcək Beynəlxalq Hakimlər Assosiasiyasının (İAJ) 67-ci Baş Assambleyasının ingilis, fransız və ispan dillərində hazırlanmış www.iaj2025.com rəsmi internet səhifəsi istifadəyə verilib.

Səhifədə iştirakçılar toplantının proqramı, iclas və panel müzakirələrinin mövzuları, praktiki məlumatlar və tədbirin keçiriləcəyi məkana dair ətraflı bilgilərlə tanış ola bilərlər.

Bundan əlavə, portalda ölkəmiz haqqında geniş təqdimatlar, eləcə də Azərbaycan Hakimlər İttifaqının fəaliyyəti barədə məlumatlar öz əksini tapıb.

Bu resurslar iştirakçılara Azərbaycanın tarixi, mədəniyyəti və hüquq sistemi barədə dolğun təsəvvür formalaşdırmağa imkan verəcəkdir.

Qeyd edək ki, Beynəlxalq Hakimlər Assosiasiyasının Bakı toplantısında Assosiasiyaya üzv olan 93 ölkədən 400-ə yaxın hakimin, hüquq sahəsində tanınmış alimlərin və beynəlxalq ekspertlərin iştirakı ilə məhkəmələrin fəaliyyəti ilə bağlı müxtəlif mövzular üzrə plenar sessiyaların, tematik panel müzakirələrinin və işçi qrup toplantılarının keçirilməsi nəzərdə tutulur.

Bununla yanaşı, tədbir çərçivəsində ölkəmizdə “Konstitusiya və Suverenlik İli”nin elan olunması münasibəti ilə “Məhkəmə və hakimiyyətin digər qolları arasında əlaqələr” mövzusunda beynəlxalq konfransın keçirilməsi nəzərdə tutulmuşdur.