BAKI, 4 aprel. TELEQRAF

Azərbaycan Respublikasının Fövqəladə Hallar Nazirliyi “İctimai şuranın vətəndaş cəmiyyəti institutları tərəfindən seçilməsinə dair Əsasnamə”nin 2-ci hissəsinə uyğun olaraq yeni İctimai Şuraya seçkilərin keçirilməsini elan edib.

Bu barədə Teleqraf-a Fövqəladə Hallar Nazirliyinin Mətbuat xidmətindən məlumat verilib.

Nazirlik bildirir ki, vətəndaş cəmiyyəti institutlarının seçkidə iştirakla bağlı müraciətləri 7 aprel 2025-ci il tarixindən 2 may 2025-ci il tarixinədək qəbul ediləcək.

Namizədlərə dair əsas tələblər aşağıdakılardır:

İctimai şurada üzvlüyə yüksək mənəvi və əxlaqi keyfiyyətlərə, fövqəladə hallar sahəsində təcrübəyə və ya biliyə malik, Azərbaycan Respublikasının 16 yaşına çatmış hər bir vətəndaş namizədliyini irəli sürə bilər;

Hər bir vətəndaş cəmiyyəti institutu yalnız bir namizəd irəli sürə bilər;

Fövqəladə Hallar Nazirliyinin işçiləri İctimai Şuraya namizədliyini verə bilməz.

Qeydiyyat üçün tələb olunan sənədlər:

Namizədin irəli sürülməsi barədə müraciət (əlaqə telefonu və e-poçt ünvanı qeyd olunmaqla);

Namizədin şəxsiyyət vəsiqəsinin surəti;

Tərcümeyi-hal;

Vətəndaş cəmiyyəti institutuna üzvlüyü təsdiq edən sənəd (əgər varsa);

Sahə üzrə təcrübəni və ya biliyi təsdiqləyən sənədlər (əmək kitabçası və ya digər təsdiqləyici sənədlər);

Əlavə məlumatverici sənədlər (istəyə bağlı olaraq).

Sənədlərin qəbulu və baxılması:

Namizədlərin qeydiyyatı fövqəladə hallar nazirinin əmri ilə yaradılmış Seçki Komissiyası tərəfindən aparılacaq. Sənədlər şənbə, bazar və bayram günləri istisna olmaqla saat 10:00-dan 17:00-dək Fövqəladə Hallar Nazirliyinə təqdim olunmalıdır. Ünvan: Bakı şəhəri, M.Müşfiq küçəsi, 501-ci məhəllə. Əlaqə telefonu: (012) 512-04-26.