BAKI, 28 iyul. TELEQRAF

Azərbaycan Qiymətləndiricilər Cəmiyyəti paytaxtın daşınmaz əmlak və torpaq bazarı üzrə qiymətləri açıqlayıb.

Qurumdan Teleqraf-a verilən məlumata görə, daşınmaz əmlak bazarının bütün seqmentlərində artım baş verib.

Belə ki, iyun ayında ötən ilin müvafiq dövrü ilə müqayisədə 1 sot torpaq sahəsinin orta qiyməti 15,4% artıb. Cari ilin may ayı ilə müqayisədə isə 1 sot torpağın orta qiyməti 3,2% yüksəlib.

Paytaxtda iyun ayında qeyri-yaşayış obyektləri ötən illə müqayisədə 12,5%, may ayı ilə müqayisədə isə 1,7% bahalaşıb.

Yeni tikili mənzillərdə illik bahalaşma 15,9%, köhnə tikili mənzillərdə isə 12,2% olub. May ayına nəzərən yeni tikili mənzillərin qiymətində 1,7%, köhnə tikili mənzillərin qiymətində isə 1,4%-lik artım baş verib.

Qeyd edək ki, 2024-cü ilin müvafiq dövrü ilə müqayisədə cari ilin iyununda Bakı şəhərində fərdi yaşayış evləri 13,5% bahalaşıb. May ilə müqayisədə isə bu sahədə artım 2,4% olub.