BAKI, 13 may. TELEQRAF
Avropanın yeraltı qaz anbarlarının doluluq səviyyəsi təxminən 43%-ə çatıb. Lakin bu hələ də ötən illə müqayisədə 24,2 milyard kubmetr və ya 34% azdır. Bununla yanaşı, Avropa İttifaqı ölkələrinin maye təbii qaz (LNG) idxalı rekord templərlə davam edir.
Teleqraf xəbər verir ki, bu barədə Avropa Qaz İnfrastruktur Operatorları Assosiasiyası (Gas Infrastructure Europe, GIE) məlumat yayıb.
GIE-nin məlumatına əsasən, mayın 11-də Aİ ölkələrinin yeraltı qaz anbarlarına qaz vurulması 407 milyon kubmetr təşkil edib. Eyni zamanda, qaz çıxarılması 13 milyon kubmetrə enib. Mayda çıxarılma ötən ilə nisbətən 38% aşağı düşüb, qaz vurulması isə 28% artıb.
Hazırda Avropanın yeraltı qaz anbarları 42,87% doludur (son beş ilin eyni tarixindəki orta göstəricidən 10,08 faiz bəndi aşağıdır), keçən il bu göstərici 64,8% idi. Avropa Komissiyasının tələblərinə görə, Aİ ölkələri hər il noyabrın 1-nə qədər anbarların doluluğunu 90% təmin etməlidirlər. Bu tələb isə Avropa qaz bazarında qiymətlərin artımına əlavə təzyiq göstərir.
Avropada istilik mövsümü martın 28-də başa çatıb və 151 gün davam edib. Bu müddətdə Aİ ölkələri yeraltı qaz anbarlarından 74 milyard kubmetrdən çox qaz çıxarıb. Xalis çıxarılma (çıxarılan və vurulan qaz həcmləri arasındakı fərq) təxminən 69 milyard kubmetr təşkil edib. Beləliklə, istilik mövsümünün sonunda anbarlardan ümumi qaz çıxarılması ötən illə müqayisədə 44% çox, xalis seçim isə 54% artıq olub.
Keçən istilik mövsümündə Avropa təxminən 63 milyard kubmetr LNG idxal edib ki, bu da bu dövr üçün üçüncü ən yüksək göstəricidir.
Apreldə Avropanın LNG idxalı müşahidələrin aparıldığı dövrdə rekord həddə çatıb – 12,8 milyard kubmetr.
