BAKI, 4 aprel. TELEQRAF
Rusiya Mərkəzi Bankının keçmiş rəhbəri, iqtisadçı Sergey Dubinin hesab edir ki, ABŞ-nin yeni rüsumları Rusiya üçün müsbət heç nə vəd etmir.
Teleqraf "Gazeta.ru"ya istinadən xəbər verir ki, ekspertə görə, tarif müharibəsi hələ ilk mərhələdədir: "Əsas məsələ digər ölkələrin atacağı addımlardadır. ÜDM-in təxminən 24%-i ABŞ-nin, 17%-i Aİ-nin, 18%-i isə Çinin payına düşür. Bu üç blok arasında böyük toqquşmanın olub-olmayacağı sualı açıq qalır. Əgər toqquşma baş verərsə, beynəlxalq ticarətin inkişafı səngiyə bilər və bunun ardınca Rusiyadan gələn məhsullara da tələbat azalacaq.
Dubinin qeyd edib ki, Rusiya xammalı, yəni neft və ilkin emal məhsulları ilk növbədə təhlükə altındadır:
"Beynəlxalq ticarətin artımının yavaşlaması Rusiyanın dünya bazarına tədarük həcminin və müxtəlif valyutalarda gəlirlərin azalması ilə nəticələnəcək. Bununla belə, Rusiya üçün dramatik dəyişikliklər gözləmirəm, çünki sanksiyalara görə Moskva faktiki olaraq qlobal maliyyə bazarlarından kənarda qalıb", - iqtisadçı yekunlaşdırıb.
Qeyd edək ki, ABŞ prezidenti bütün idxal mallarına 10% əsas rüsum tətbiq edib. Siyahıda 185 ölkə, o cümlədən Britaniya, Ukrayna və hətta yaşayış olmayan adalar da var. Rusiya isə siyahıda yoxdur. Çünki iki ölkə arasında ticarət əlaqələri mövcud deyil.
