BAKI, 4 aprel. TELEQRAF

"Avropa Rusiyadan qaz asılılığını tamamilə aradan qaldırmaq istəyir. Bu da Rusiyanın Ukraynaya səbəbsiz müdaxiləsi ilə bağlıdır".

Teleqraf xəbər verir ki, bu barədə Cənub Qaz Dəhlizi Məşvərət Şurası nazirlərinin 11-ci iclası və Yaşıl Enerji Məşvərət Şurası nazirlərinin 3-cü iclasının yekunlarına dair keçirilən mətbuat konfransı zamanı Avropa İttifaqının enerji və mənzil məsələləri üzrə komissarı Dan Yorgensen qeyd edib.

O bildirib ki, Avropa Rusiya qazından asılılığı 45 faizdən 13 faizə endirib:

“Məqsədimiz bu göstəricini tamamilə sıfıra endirməkdir. Bu yalnız Azərbaycan kimi yaxşı dostların dəstəyi ilə mümkün olub və gələcəkdə də yalnız bu yolla mümkün olacaq. Biz buna görə çox minnətdarıq və hesab edirik ki, bu qarşılıqlı fayda və əməkdaşlıq gələcəkdə də davam etməlidir, hətta imkan olsa, daha da genişləndirilə bilər.

Eyni zamanda, biz yaşıl keçid istiqamətində də sıx əməkdaşlıq edirik. İqtisadiyyatlarımızı karbon emissiyalarından azad etməliyik. Bizim çox iddialı bir hədəfimiz var – 2050-ci ilə qədər karbon neytrallığına nail olmaq. Artıq 2040-cı ilə qədər emissiyalarımızı 90 faiz azaldacağıq. Bu isə təbii olaraq o deməkdir ki, biz bərpa olunan enerji sahəsində də dost və tərəfdaşlarla birgə işləyirik. Enerji səmərəliliyi bizim üçün çox önəmlidir. Bu, bugünkü əsas mövzulardan biri idi”.