BAKI, 4 aprel. TELEQRAF

Azərbaycan Mərkəzi Bankında ikinci qəbul dövrünün yekunu olaraq xüsusi tənzimləmə rejimində iştirakla bağlı ümumilikdə daxil olmuş 14 müraciətin qiymətləndirilməsi həyata keçirilir.

Mərkəzi Bankdan Teleqraf-a verilən xəbərə görə, bu mərhələdə müraciətlərin tələblərə uyğunluğu baxımından dəyərləndirilməsi və onların xüsusi tənzimləmə rejiminə qəbulu üzrə yekun qərar qəbul olunacaq.

Daxil olan müraciətlər virtual aktivlər, ödəniş xidmətləri, eləcə də sığorta və maliyyə bazarlarının digər sahələri üzrə innovativ məhsulların sınaqdan keçirilməsi ilə bağlıdır.

Xüsusi tənzimləmə rejimi maliyyə bazarlarında innovativ maliyyə məhsullarının məhdud çərçivədə və Mərkəzi Bankın nəzarəti altında sınaqdan keçirilməsi üzrə tədbirləri özündə cəmləyən qaydalar toplusudur. Bu rejimin iştirakçısı innovativ maliyyə məhsulunun sınağını Mərkəzi Bank ilə bağlanılacaq müqavilə əsasında həyata keçirəcək.

Xüsusi tənzimləmə rejimi meyarlarına uyğun gələn və sınağı uğurla başa çatdıran innovativ məhsulların maliyyə bazarlarında tətbiqi və bu sahədə tənzimləmə çərçivəsinin yaradılması nəzərdə tutulub.