Bakı, 4 aprel. TELEQRAF

Azərbaycan ilə Avropanın digər hissəsi arasındakı əməkdaşlığın əhəmiyyəti gedərək artır. Burada yaşıl enerjini də qeyd etmək yerinə düşər. Azərbaycan ilə Sloveniya arasında konstruktiv münasibətlər qurulub. Biz müəyyən dərəcədə kiçik ölkəyik və enerji asılılığımız var. Enerji təchizatının vacibliyini anlayır və bilirik ki, bu, iqtisadi inkişafın əsas meyarıdır.

Teleqraf xəbər verir ki, bunu Sloveniyanın ətraf mühit, iqlim və energetika naziri Bojan Kumer Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı deyib.

“Biz kiçik ölkəyik və enerji asılılığımız var. Buna görə də enerji təchizatının sabitliyi və şaxələndirilməsi iqtisadi inkişafımız üçün həyati əhəmiyyət daşıyır”, – deyə Bojan Kumer bildirib. Onun sözlərinə görə, dəyişən geosiyasi vəziyyət fonunda enerji resurslarına və marşrutlarına çıxışın alternativləşdirilməsi daha da aktuallaşıb.

Nazir əlavə edib ki, Cənub Qaz Dəhlizi Xəzər regionunu Avropa bazarlarına birləşdirən strateji əhəmiyyətli marşrutdur. Eyni zamanda, o vurğulayıb ki, gələcəkdə enerji təhlükəsizliyi yalnız təbii qazla məhdudlaşa bilməz: “Azərbaycanın COP29-a sədrliyi iqlim dəyişikliyi ilə mübarizədə atılacaq addımlar üçün mühüm mesajdır. Biz bu istiqamətdə yaşıl enerji və hidrogen kimi sahələrdə əməkdaşlığı genişləndirməliyik.”

Sloveniya tərəfi Azərbaycanla qaz təchizatı və təmiz enerji texnologiyaları sahəsində əməkdaşlığın daha da gücləndirilməsində maraqlıdır. Bojan Kumer, Avropa Komissiyasının bu əməkdaşlığın inkişaf etdirilməsi yolundakı səylərini də alqışlayıb.