BAKI, 4 aprel. TELEQRAF

Londonun ICE birjasında "Brent" markalı neftin qiyməti 7,4% düşərək bir barel üçün 64,74 dollar olub. Sonuncu dəfə neftin 65 dollardan aşağı 2021-ci ilin avqust ayında satılıb.

Teleqraf xəbər verir ki, ABŞ prezidenti Donald Trampın bütün ölkələrdən idxal olunan məhsullara yeni tariflər tətbiq etməsindən sonra neftin qiyməti aşağı düşüb.

Belə ki, qlobal ticarət müharibəsinin neftə olan tələbi azalda biləcəyi ilə bağlı narahatlıqlar, OPEC+ ölkələrinin neft hasilatını sürətli artırmaq qərarı bazara mənfi təsir göstərib.

Qeyd edək ki, son proseslərdən sonra "Goldman Sachs" neftin qiyməti ilə bağlı proqnozlarını 5 dollar/barel aşağı salıb. İnvestisiya bankının analitiklərinə görə, 2025-ci ildə "Brent" markalı neft 69/66 dollar, 2026-cı ildə 62/59 dollar təşkil edəcək.

"Biz artıq qiymət intervalı proqnozlaşdırmırıq, çünki daha yüksək tənəzzül riski səbəbindən qiymət dəyişikliyi ilə bağlı gözləntilər qüvvədədir".