BAKI, 2 aprel. TELEQRAF

2025-ci ilin yanvar-fevral aylarında qeyri-neft sektoru üzrə dövlətə məxsus əsas ixracatçı subyektləri arasında ən yüksək ixrac göstəricisi ARDNŞ-nin Marketinq və İqtisadi Əməliyyatlar İdarəsinə aid olub. Belə ki, şirkət 70,4 milyon ABŞ dolları dyərində məhsul ixrac edib. Bu göstərici 2024-cü ilin eyni dövründə 62,3 milyon ABŞ dolları olub.

Teleqraf İqtisadi İslahatların Təhlili və Kommunikasiya Mərkəzinin təqdim etdiyi "İxrac icmalı"ına istinadən xəbər verir ki, “SOCAR Polymer” MMC-nin ixracı 2025-ci ildə 30,3 milyon ABŞ dolları təşkil edib. 2024-cü ildə bu rəqəm 34,1 milyon ABŞ dollar olub. “Azəralüminium” MMC 2025-ci ildə 23,4 milyon dollar dəyərində məhsul ixracı reallaşdırıb.

“Azərpambıq Aqrar Sənaye Kompleksi” MMC 2025-ci ilin yanvar-fevral aylarında 2024-cü ilin ilk ayı ilə müqayisədə ixracını 3,1 milyon dollar artıraraq 7,8 milyon dollara çatdırıb. “Azərbaycan Hava Yolları” QSC dı ixracını 2 dəfəyə yaxın artırıb. Şirkət 1,9 milyon dollarlıq ixrac reallaşdırıb.

Bundan əlavə, “AzərEnerji” ATSC və Naxçıvan MR Dövlət Energetika Xidmətinin də ixrac potensialı yüksəlib. “Azərenerji”nin ixrac gəlirləri 18 dəfəyə yaxın artıb.

Qeyd edək ki, bu ildən ixracata başlayan Dövlət Neft Şirkətinin Qaz İxrac İdarəsi 2025-ci ilin yanvar-fevral aylarında 15,6 milyon dollar, Qaradağ Şüşə Zavodu isə 43 min dollar dəyərində ixrac həyata keçirib.