BƏRDƏ, 28 oktyabr. TELEQRAF

Baş verən yol-nəqliyyat hadisəsi ilə əlaqədar 1 nəfər (kişi) saat 05:00 radələrində Bərdə Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Bu barədə Teleqraf-ın sorğusuna cavab olaraq TƏBİB-dən bildirilib.

Qeyd olunub ki, sağ bud sümüyünün aşağı 1/3 yerdəyişmiş sınığı diaqnozu təyin edilən pasiyentin müalicəsi Reanimasiya şöbəsində davam etdirilir, vəziyyəti ağır olaraq qiymətləndirilir.

***

10:52

Bərdə rayonunun Mehdili kəndində “VAZ” markalı iki minik avtomobilinin toqquşması nəticəsində ölənlərin sayı üçə çatıb.

Teleqraf-ın yerli bürosunun məlumatına görə, avtomobildə ata və oğul olmaqla 1968-ci il təvəllüdlü Ələddin Əliyev, onun oğlu Alı Əliyev həyatını itirib.

Digər oğul 2005-ci il təvəllüdlü oğul Röyal Əliyev ağır vəziyyətdə Bərdə Rayon Mərkəzi Xəstəxanasına çatdırılıb.

Hadisə zamanı “VAZ” markalı digər minik avtomobilində olan polis əməkdaşı 2003-cü il təvəllüdlü Səyyad Əliyev də ölüb.

Faktla bağlı araşdırma aparılır.

***

Fövqəladə Hallar Nazirliyinin "112" qaynar telefon xəttinə Bərdə rayonunun Mehdili kəndində yol-nəqliyyat hadisəsinin baş verməsi ilə əlaqədar xilasedici köməyinə ehtiyac yaranması barədə məlumat daxil olub.

FHN-dən Teleqraf-a verilən xəbərə görə, məlumatla əlaqədar Nazirliyin Qarabağ Regional Mərkəzinin xilasetmə qüvvələri çağırış üzrə cəlb olunublar.

Əməliyyat şəraiti qiymətləndirilərkən müəyyən olunub ki, “VAZ” markalı iki minik avtomobili toqquşub, 2 nəfər avtomobillərdə sıxılı vəziyyətdə qalıb.

Həyata keçirilən tədbirlər nəticəsində sıxılı vəziyyətdə qalan 2 nəfərin meyiti çıxarılaraq aidiyyəti üzrə təhvil verilib.