AĞDAM, 25 iyul. TELEQRAF
Ağdam, Xocalı, Xocavənd, Füzuli, Ağdərə rayonlarında mürəkkəb relyefli dağlıq ərazidə baş vermiş yanğınların söndürülməsi istiqamətində Fövqəladə Hallar Nazirliyi tərəfindən zəruri və təxirəsalınmaz tədbirlər davam etdirilir.
Nazirlikdən Teleqraf-a verilən xəbərə görə, relyefin mürəkkəbliyi, havanın yüksək temperaturu və küləkli olması yanğınsöndürmə işlərini çətinləşdirsə də yanğınla mübarizə tədbirləri fasiləsiz olaraq həyata keçirilir.
Ümumilikdə yanğınların söndürülməsi əməliyyatında FHN-in Dövlət Yanğından Mühafizə və Xüsusi Riskli Xilasetmə xidmətləri, Qarabağ Regional Mərkəzinin müvafiq qüvvələri və Aviasiya dəstəsinin helikopterləri iştirak edir.
Əlavə məlumat veriləcək.
***
12:44
Ağdamda başlayan yanğın Xocavənd rayonunun ərazisinə keçib.
Teleqraf-ın Qarabağ bürosunun məlumatına görə, Ağdam rayonunun Gülablı kəndində başlayan yanğın sürətlə genişlənərək, Xocavənd rayonunun Mirikənd kəndi istiqamətində yayılıb.
Hazırda Fövqəladə Hallar Nazirliyinin Ağdam, Ağcabədi, Yevlax və Xankəndi rayonlarından cəlb olunmuş 7 yanğınsöndürən texnika və 80 nəfərlik şəxsi heyət, eləcə də 2 helikopter yanğının söndürülməsi istiqamətində tədbirlər görür.
