BAKI, 6 fevral. TELEQRAF

Peru millisinin və "Alianza Lima" komandasının müdafiəçisi Karlos Zambrano bir təqvim ili ərzində beynəlxalq klub turnirlərində ən çox qırmızı vərəqə alan futbolçu kimi tarixə düşüb.

Teleqraf Beynəlxalq Futbol Tarixi və Statistikaları Federasiyasına (IFFHS) istinadən xəbər verir ki, 36 yaşlı oyunçu 2025-ci il ərzində qitə miqyaslı turnirlərdə (ICC) 4 dəfə meydandan qovulub.

O, cari mövsümdə əvvəlcə "Libertadores Kuboku"nda iki dəfə, klubunun bu turnirdən kənarlaşmasından sonra isə Cənubi Amerika Kubokunda (Copa Sudamericana) daha iki dəfə qırmızı vərəqə ilə cəzalandırılıb.

Maraqlıdır ki, bu vərəqələr klubun keçirdiyi cəmi 6 beynəlxalq oyun ərzində qeydə alınıb.

Buna qədərki dünya rekordu "Qarabağ"ın futbolçusu Elvin Cəfərquliyevə məxsus idi. Azərbaycanlı müdafiəçi 2024-cü ildə UEFA Avropa Liqası çərçivəsində keçirilən oyunlarda 3 dəfə qırmızı vərəqə alaraq bu siyahıya başçılıq edirdi.