BAKI, 2 aprel. TELEQRAF

Zədəsini bərpa edərək, "Neftçi"nin sıralarına dönən aparıcı futbolçu Emin Mahmudov "Sabah" komandasına qarşı Azərbaycan Kubokunun ilk yarımfinal oyununda forma geyinib.

66-cı dəqiqədə meydana daxil olan 33 yaşlı yarımmüdafiəçi "ağ-qaralar"ın 1:2 hesablı ev məğlubiyyətinə əngəl ola bilməyib.

Qarşılaşmanın ardından Mahmudov Teleqraf-ın əməkdaşının da olduğu müsahibədə jurnalistlərin suallarını cavablandırıb. O, əvvəlcə matçı dəyərləndirib:

- Oyun istədiyimiz kimi alınmadı. Rəqib bizi əks-hücumlarda yaxşı yaxalayırdı. Hələ cavab görüşümüz də var. İnanıram ki, axıradək vuruşaraq geridönüş edəcəyik.

- Bugünkü oyundan sonra nə dərəcədə realdır?

- Evdə və səfərdə bundan da pis oyunlarımız olub. O cümlədən, kubok qarşılaşmalarında da. 2022/2023 mövsümündə Konfrans Liqasının 2-ci təsnifat mərhələsinin ilk oyununda Kiprin "Aris" komandası bizə 10 top vurmalı idi, amma 2-ni vura bildi. Biz isə Bakıdakı cavab görüşündə 3:0 hesabı ilə qalib gələrək, mərhələ adladıq. Yenə də hər şey mümkündür. Azarkeşlərimizə borcluyuq. Çalışacağıq ki, borcumuzu qaytaraq.

- Komandanızda düşünülmüş bir şey görmədik. Xüsusən, hücum planında axsadığınız göz önündə idi...

- Düşünülmüş oyun var, sadəcə, istədiyimiz kimi alınmır. Yaxşı getmədiyini başa düşürük, dəyişməliyik.

- Özünüz cavab oyununa tam hazır olacaqsınız?

- Hazır olacağam. Bu oyundan əvvəl bir məşq keçirmişdim. Dərhal da oyuna çıxdığımdan, mənə bir az çətin oldu. Üstəlik, Ryonosuke Ohori zədələnərək meydanı tərk etdi və biz 10 nəfərlə qaldıq. Buna görə də bir az yoruldum. İnanıram ki, "Sabah" komandası ilə ikinci oyuna hazır olacağam.

- Yəni, bugünkü məğlubiyyətə baxmayaraq, "Neftçi" hələ əlini finaldan üzməyib...

- Əlbəttə. Çalışacağıq ki, ikinci oyunda qələbə qazanaraq, finala yüksələk.

- Məşqlərdə xətlərarası əlaqələr üzərində çalışırsınız?

- Çalışırıq. Sadəcə, "Sabah" istədiyini bizdən daha yaxşısını etdi.

- Rəqib baş məşqçi Vasili Berezutski mətbuat konfransında təkcə "Neftçi"yə deyil, hakimlərə qarşı da oynadıqlarını bildirib. Sizcə, o, nə dərəcədə haqlıdır?

- Bilmirəm. Özü də diqqətlə oyuna baxsa, görər ki, hakimlik heç nə yox idi.

- Cəza üzündən yarımfinal oyunlarını buraxan hücumçu Bassala Sambunun yoxluğu oyununuza nə dərəcədə təsirini göstərdi?

- Sambu gəldiyi gündən yaxşı oyun sərgiləyir. Onun da oynaması bizim üçün vacib idi. Amma digər hücumçularımız da var. Onların köməkliyi ilə mərhələ adlayarıq.

- Adınız Rusiya klubları ilə hallanır. Mövsümün sonunda "Neftçi"ni tərk edəcəyiniz barədə xəbərlər nə dərəcədə həqiqətə uyğundur?

- Mənim "Neftçi" ilə müqaviləm var və bu komandanın uğurlarını düşünürəm.