BAKI, 2 aprel. TELEQRAF

"Mərhələ adlayacağımıza 100 faiz inam var. Əlbəttə var".

Teleqraf xəbər verir ki, bunu "Neftçi"nin baş məşqçisi Samir Abasov evdə "Sabah" komandasına 1:2 hesabı ilə uduzduqları Azərbaycan Kubokunun ilk yarımfinal oyunundan sonra mətbuat konfransında deyib.

Onun sözlərinə görə, ilk oyunun hesabı hətta böyük olsa belə, heç nəyi həll etmir: "Kubok oyunları 180 dəqiqə, hətta hərdən əlavə vaxt və penaltilərə getsə, daha çox davam edə bilər. Cavab oyununa da qələbə üçün çıxacağıq. Bu gün də belə idi. Nə dərəcədə yerinə yetirib-yetirmədikləri başqa söhbətin mövzusudur. Artıq yeganə çıxış yolumuz qalibiyyətdir. Əlbəttə, inamımız var".

Abasov bəzi çatışmazlıqları aradan qaldırmalarının vacibliyini vurğulayıb: "Futbolçuları da bəzi aspektlərdən dəyişdirməli, bəzi epizodları yaxşılaşdırmalıyıq. Heç olmasa, bu oyundakı bəzi şeyləri içərimizdən çıxarmalıyıq. Bu gün təkbətək mübarizələrdə rəqibə çox uduzduq. Dediyim çatışmazlıqları aradan qaldırsaq, düşünürəm ki, səfər oyununda qələbə üçün oynaya biləcəyik".

Əlindəki heyətin kubok qazanmaq üçün yetərli olub-olmadığı barədə sualı başqa söhbətin mövzusu adlandıran 47 yaşlı mütəxəssis problemlər barədə indidən danışmaq istəmədiyini söyləyib: "Desəm, danışsam, incələməyə, xırdalamağa başlasam, bunun özü də şişməyə başlayacaq, fərqli və özüm tərəfdən yersiz mövzu olacaq. Çempionatın sonuna 8 tur qalıb. Amma özümüz "Neftçi"nin promlemlərini bilirik, görürük, müəyyənləşdirmişik. Uçurumlu boşluqlarımızın harada olduğunu həm statistik, həm oyun, həm də etmək istədiklərimiz baxımından həqiqətən bilirik. Düşünmürəm ki, bu problemlər çempionatın sonunadək həll oluna bilsin. Lakin bu gün həm heyət, həm heyətdəki futbolçularla bağlı nə isə desəm, bu mövzu şişəcək. Ona görə də bu barədə danışmaq istəmirəm. Ən azından, çempionatın axırını gözləyək".

Abasov rəqib həmkarının 11 yox, 14 nəfərə qarşı oynadıqları fikrinə isə belə reaksiya verib: "Açığı, ehtiyat oyunçular skamyasında etiraz etmələrini görürdüm. Oyuna baxdıqda, bunu görməmək mümkün deyil. Hansı epizodlara etiraz etdiklərini bu dəqiqə deyə bilmərəm. Amma həmkarımın söylədiklərinə də fikir bildirmək istəmirəm. O da emosional insandır, onlar da nələrisə görürlər. Bunu deyirsə, həmkarım və rəqib komanda barədə danışmağım yersizdir. Bunu özünüz məndən yaxşı bilirsiniz".

Baş məşqçi "Neftçi"nin oyunundan narazı qalmadığını da dilə gətirib: "Birinci hissədə bəzi elementlər var idi ki, həddindən artıq yaxşı da yerinə yetirirdik. Epizodlar da yaratmışdıq. Bəzi şeyləri isə alındırmağa çalışırdıq. Sadəcə, bəzi epizodlar var ki, onları dəyişə bilməyəcəyimi desəm, bunu da düzgün qəbul etməyəcəklər. Hələlik oyun keyfiyyəti barədə danışmayaq. Çempionatın sonunadək oyunlarımız var. Bəzi şirkətlərin statistik analizləri ilə bizim görüb-müəyyənləşdirdiklərimiz tamamilə üst-üstə düşür. Uzağa getməyək, müdafiə xəttimiz fərdi olaraq, həddindən artıq bərbad vəziyyətdədir. Təkbətək epizodların sonu yüz faizlik hücumlarla yekunlaşır. Bunu futbolçular bir-birilərini sığortalamaqla aradan qaldıra bilərlər. Amma dərd odur ki, bir nəfər üç nəfərə qarşı üstünlük yaradır və bu da qlobal problemlərə gətirib çıxarır. Aradan qaldırmağın bir yolu da çoxlu epizod yaradıb çoxlu qol vurmaqdır. Təəssüf ki, bunu da bacarmırıq. Hətta qol vəziyyətləri yaratdığımız oyunlarda da. Belə problemlərimiz var".