BAKI, 30 sentyabr. TELEQRAF

Serbiyanın “Elektroprivreda Srbije”, “Srbijagas” şirkətləri və Azərbaycanın Dövlət Neft Şirkətinin (SOCAR) nümayəndələri bu gün Niş yaxınlığında qaz elektrik stansiyasının tikintisi ilə bağlı birgə layihənin həyata keçirilməsi üzrə səhmdarlar sazişi imzalayıblar.

Teleqraf xəbər verir ki, Serbiyanın texniki mandatda olan mədən və energetika naziri Dubravka Cədoviç Handanoviç bildirib ki, layihənin 2030-cu ildə başa çatdırılması gözlənilir.

Müqaviləni Serbiya hökuməti tərəfindən “Elektroprivreda Srbije” şirkətinin baş direktoru Duşan Jivkoviç, “Srbijagas” şirkətinin baş direktoru Duşan Bayatoviç və SOCAR-ın Türkiyədəki direktoru Elçin İbadov imzalayıblar. Mərasimdə Serbiyanın mədənçilik və energetika naziri Dubravka Dyedoviç Handanoviç və Azərbaycanın Belqraddakı yeni səfiri Tahir Tağızadə iştirak ediblər.

“SOCAR-ın həm Azərbaycanda, həm də oxşar layihələrdə böyük təcrübəsi var. Təbii ki, biz bu təcrübəyə güvənirik. Digər tərəfdən, ölkənin enerji təhlükəsizliyinin dayağı olan şirkətlərimiz – “Elektroprivreda” və “Srbijagas” da bu tərəfdaşlığa öz bilik və təcrübələri ilə töhfə verəcək. Məqsədimiz bu layihənin tikintisinin və istismara verilməsinin mümkün qədər tez başa çatdırılmasıdır. Hazırda hədəf bunu 2030-cu ildə, yəni qarşıdakı dörd il ərzində həyata keçirməkdir”, – deyə Dyedoviç Handanoviç bildirib.

“Serbiya və Azərbaycan hər mənada tərəfdaş ölkələrdir. Uzunmüddətli, yaxşı siyasi və iqtisadi münasibətlərimizi, ilk növbədə, iki prezidentin təşəbbüsü ilə daha da dərinləşdiririk. Serbiyada qaz elektrik stansiyasının tikintisi üzrə birgə layihənin həyata keçirilməsinə dair saziş də imzalamışıq və bu saziş Milli Assambleya tərəfindən ratifikasiya edilib. Layihənin hazırlanmasında, o cümlədən zəruri texniki sənədlərin hazırlanmasında və tikintinin mümkün qədər tez başlaması üçün digər ilkin şərtlərin təmin edilməsində xeyli irəliləyiş əldə etmişik”, – deyə o əlavə edib.

Onun sözlərinə görə, Serbiyada elektrik enerjisinə, xüsusilə də baza yük enerjisinə (baseload energy - eng.) tələbat getdikcə artır, çünki ölkə hələ də əsasən kömürdən asılıdır:

"Bu il hidroloji vəziyyət çox əlverişsiz olub. Buna görə də yeni və etibarlı baz yük enerji mənbələrinin yaradılması vacibdir və Azərbaycanla birgə layihə buna töhfə verəcək. SOCAR ilə tərəfdaşlıq bizim üçün çox vacibdir. İlk növbədə, bu, dost ölkə Azərbaycanla əməkdaşlıqdır. Eyni zamanda, Azərbaycan son üç ildə – Serbiya ilə Bolqarıstan arasında qaz interkonnektorunu tamamladığımız vaxtdan etibarən – Serbiyanın qaz təchizatçısıdır. Bu əməkdaşlığı qaz təchizatı sahəsində bu qış da davam etdirəcəyik. Əməkdaşlığın dərinləşdirilməsi isə məhz qaz elektrik stansiyasının tikintisi layihəsinin həyata keçirilməsini nəzərdə tutur”.

O əlavə edib ki, layihənin həyata keçirilməsi üçün qarşıda çoxlu iş və öhdəliklər var:

“Buna görə də əvvəlki kimi iddialı, çalışqan və səmərəli olmalıyıq. Bu müqavilənin imzalanması layihə üzrə artıq başa çatdırılmış digər işlərlə paralel həyata keçirilir. Bunlara ərazi planının qəbul edilməsi, əsas sənədlərin hazırlanmasına başlanılması, ilk növbədə konseptual həll üzrə tədqiqat və şəbəkəyə qoşulma üzrə tədqiqatlar daxildir. Həmçinin texniki-iqtisadi əsaslandırma üzrə araşdırmanın hazırlanması üçün də müqavilə bağlanıb”, – deyə o bildirib.

Dyedoviç Handanoviç bütün bu təhlillərin gələn ilin fevral və ya mart ayına qədər başa çatdırılacağını gözlədiyini deyib. Bundan sonra iqtisadi səmərəlilik üzrə araşdırmanın tamamlanması və layihəni maliyyələşdirəcək maliyyə qurumları ilə danışıqlara başlanılması nəzərdə tutulur.

Qeyd edək ki, müqavilə birgə müəssisənin yaradılmasına imkan verir, layihənin kommersiya aspektlərini və layihəni həyata keçirən şirkətlərin məsuliyyətlərini müəyyənləşdirir.

Niş yaxınlığında inşa ediləcək 500 MVt gücündə qaz elektrik stansiyası elektrik və istilik enerjisi istehsal edəcək. Ötən dövrdə layihə üzrə işlər intensivləşdirilib, idarəetmə komitəsi, layihənin idarə olunması üzrə komanda və hər bir iş istiqaməti üzrə beş texniki komanda yaradılıb.

Xatırladaq ki, Serbiya və Azərbaycan bu ilin fevralında Serbiyada qaz-buxar dövrəli elektrik stansiyasının inkişafı, layihələndirilməsi, tikintisi və idarə olunmasına dair saziş imzalayıblar. Saziş Serbiya Prezidenti Aleksandar Vuçiç və Azərbaycan Prezidenti İlham Əliyevin iştirakı ilə imzalanıb.

Medial
Medial