BAKI, 21 iyun. TELEQRAF

ABŞ Prezidenti Donald Trampın Livanda fəaliyyət göstərən şiə hərəkatı "Hizbullah"a qarşı mübarizəyə Suriya qüvvələrinin cəlb edilməsinə meylli olduğu bildirilir.

Teleqraf xəbər verir ki, bu barədə "Fox News" telekanalının jurnalisti Trey İnqst Donald Trampla müsahibəsinə əsasən məlumat verib.

Jurnalistin sözlərinə görə, Tramp İsrailin "Hizbullah"a qarşı mübarizəsinin nəticələrindən narazıdır.

"Prezident mənə dedi ki, İsrailin "Hizbullah"ı məğlub edə bilməməsindən məyusdur. O hesab edir ki, onlar binaları dağıtmadan heç nə edə bilmirlər və bu məsələnin Suriyaya həvalə olunmasına yaxındır", - deyə İnqst bildirib.

Onun sözlərinə görə, Tramp Suriyanın prezidenti Əhməd Əl Şaraanın Livanın cənubuna daxil olaraq "Hizbullah"a qarşı əməliyyatlar aparmaq səlahiyyəti almasını mümkün variant kimi nəzərdən keçirir.

Jurnalist qeyd edib ki, ABŞ lideri Əhməd Əl Şaraanın "Hizbullah"a qarşı daha hədəfli şəkildə, binaları dağıtmadan və quru əməliyyatları vasitəsilə mübarizə apara biləcəyini düşünür.

İnqst əlavə edib ki, Tramp İsrail tərəfinin "Hizbullah"a qarşı əməliyyatları aparmaq üsulundan narazılığını da ifadə edib.