
BAKI, 1 aprel. TELEQRAF
"İnanırıq ki, qardaş ölkə Türkiyə sərhədin açılması qərarını çıxararkən, nəzərə alacaq ki, İrəvanın Ankara qarşısında 100 illik ərazi və soqırımı tələbini indi irəli sürməməsinin ən böyük səbəbi bizim Qarabağ qələbəmizdir".
Teleqraf xəbər verir ki, bunu Milli Məclisin bugünkü iclasında İnsan hüquqları komitəsinin sədri Zahid Oruc deyib.
O bildirib ki, indi Azərbaycanın taleyi özündən asılıdır:
"Dövlət rəhbəri və mərkəzi hakimiyyət sistemi güclü olanda xarici amillər dağıdıcı təsirini itirir. Ölkəmizdə kənar qüvvələrin hökmran mövqeyi heç vaxt indiki qədər zəif olmayıb. Qarabağda qələbəmiz tarixdə ilk dəfə dövlətimizə yeni Yalta konfransına vəsiqə qazandırıb. Ermənistana sərhədi başqa paytaxtlar yox, məhz liderimiz göstərir. İrəvanın taleyi heç vaxt indiki qədər Bakıda həll olunmayıb. 300 illik erməni ideyası iflasa uğrayıb və ermənilər Xankəndidən olduğu kimi, İrəvandan da könüllü çıxıb gedirlər".