BAKI, 3 aprel. TELEQRAF

“Azərbaycanla Avropa İttifaqına üzv olan dövlətlərlə qarşılıqlı əməkdaşlıq daim inkişaf etdirilir. Avropa İttifaqının doqquz ölkəsi ilə strateji tərəfdaşlığı haqqında sənədin imzalanması göstərir ki, Azərbaycan Avropa üçün strateji əhəmiyyət daşıyan ölkədir. Azərbaycan Avropa İttifaqının aparıcı ölkələrindən biri olan Almaniya ilə də fəal əməkdaşlığa malikdir”.

Bu sözləri Teleqraf-a açıqlamasında Milli Məclisin deputatı Sevinc Fətəliyeva deyib.

Deputat bildirib ki, Azərbaycan və Almaniya arasında davamlı siyasi dialoq mövcuddur, iqtisadiyyat və humanitar sahələrində geniş əməkdaşlıq həyata keçirilir. Almaniya Prezidenti Frank Valter Ştaynmayerin ölkəmizə rəsmi səfəri də əlaqələrimizin inkişafı baxımından böyük əhəmiyyət kəsb edir. Onun sözlərin görə, Almaniya Azərbaycanın müstəqilliyini 1992-ci ilin 12 yanvarında tanıyıb. İki ölkə arasında diplomatik münasibətlər isə 1992-ci ilin fevralında qurulub. Diplomatik münasibətlərin yaranmasından sonra Azərbaycan və Almaniya arasında əlaqələr mütəmadi olaraq inkişaf edib.

O qeyd edib ki, Almaniya Azərbaycanı Cənubi Qafqazda vacib tərəfdaş kimi qəbul edir, ölkəmizin regionda lider mövqeyini, həmçinin beynəlxalq səviyyədə tanınmış sərhədləri daxilində suverenliyini və ərazi bütövlüyünü tam dəstəkləyir. Eyni zamanda, bu ölkə Azərbaycanın Avropanın enerji təhlükəsizliyinin təmin olunmasında mühüm rolunu təqdir edir. Bunu Almaniya Prezidentinin mətbuata bəyanatında səsləndirdiyi fikirlər də təsdiqləyir. Almaniya Prezidenti Azərbaycandan əvvəl Ermənistanda olub və orada da ölkəsinin Cənubi Qafqazda sülhün və sabitliyin təmin olunmasına maraqlı olduğunu bəyan edib. Bakıya səfər zamanı da bu məsələ müzakirə mövzusu olub. Mətbuata bəyanat zamanı Prezident İlham Əliyev bəyan edib ki, Azərbaycan 30 il ərzində erməni işğalından əziyyət çəkib:

“Bizim xalqımız etnik təmizləməyə məruz qalmışdır. Bir milyon azərbaycanlı erməni aqressiyasına görə evsiz-eşiksiz qalmışdır və torpaqlarımızın təxminən 20 faizi işğal altına düşmüşdür. Əfsuslar olsun ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir. Məhz bu tarixi Zəfərimiz sülh danışıqlarına yol açmışdır. Hesab edirəm ki, bu gün Azərbaycanın və Ermənistanın sülhün əldə edilməsində mövqeləri bir-birinə kifayət qədər yaxınlaşmışdır”. Dövlətimizin başçısı alman jurnalistin sualına cavab olaraq bildirib ki, əgər doğrudan da Ermənistan sülh müqaviləsini imzalamaq istəyirsə, Azərbaycanın iki legitim şərtini qəbul etməlidir. Həmin şərtlər isə Ermənistan konstitusiyasında dəyişikliklər edilməsi və ATƏT-in Minsk qrupunun ləğvidir. Almaniya Prezidenti isə ölkəsinin Qarabağı Azərbaycanın ərazisi kimi tanıdığını bəyan edib: “Biz sülh müqaviləsinin hazırlanmasını çox alqışlayırıq və Qarabağ regionunun Azərbaycan ərazisi olduğunu bilirik, tanıyırıq. Bu, bizim mövqeyimizdir və bu mövqe Azərbaycan tərəfindən də konkretləşdirilə bilər. Ümumiyyətlə, proseslər göstərir ki, Almaniya Azərbaycanla əlaqələrini inkişaf etdirməkdə maraqlıdır və dövlət başçısının bu səfəri, ölkəmizlə bağlı xoş təəssüratları Azərbaycan-Almaniya münasibətlərində yeni səhifə açacaq”.