BAKI, 3 aprel. TELEQRAF

Milli Məclisin Beynəlxalq münasibətlər və parlamentlərarası əlaqələr komitəsinin sədri, deputat Səməd Seyidov Teleqraf-ın suallarını cavablandırıb.

Onunla müsahibəni təqdim edirik:

- Səməd müəllim, Azərbaycanla Ermənistan arasında sülh mətni üzərində razılaşma fonunda şərti sərhəddə atəş səsləri səngimək bilmir. İrəvan sülhdən danışırsa, Azərbaycanın mövqelərinə atəş açan kimdir?

- Ermənistan tərəfi özünü dünyaya sülh göyərçini kimi təqdim etdiyi halda, revanşist qüvvələrin Azərbaycana qarşı təxribatları davam edir. Bu regionda vəziyyəti gərginləşdirməklə yanaşı, İrəvanın növbəti ikiüzlü siyasətinin mahiyyətini göstərir. Ona görə də burada qeyri-adi fəlsəfə yoxdur. Onlar həmişə belə ediblər. Almaniya prezidentinin Azərbaycana səfəri çərçivəsində təşkil edilən birgə mətbuat konfransında da Prezident İlham Əliyev konkret olaraq bu məsələ ilə bağlı mesajlar verdi. Bəyan edildi ki, vaxtilə “Qarabağ Ermənistandır” daha sonra “Qarabağ Azərbaycandır” deyən bir adamdır, Baş nazir Nikol Paşinyan. İndi də həmin adam sülhdən danışa-danışa Azərbaycan Ordusunun mövqelərinə güllə atdırır.

- Hərbi təxribatlar fonunda sülhə nail olmaq nə dərəcədə məntiqlidir?

- Sözsüz ki, Ermənistan bir qonşu dövlət kimi Azərbaycanın təklif etdiyi, gündəmə gətirdiyi məsələləri qəbul etməsə, sülhdən danışmaq çətin olacaq. İrəvan sülh mətni üzərində razılaşmaya gəlibsə, digər məsələləri də həll etməlidir. Ermənistan yerdə qalan "ev tapşırıqları"nı - yəni konstitusiya dəyişikliyi, ATƏT-in Minsk Qrupundan imtina və Avropa İttifaqının nümayəndələrinin şərti sərhəddə çıxarılması tələbəni də icra etməlidir.

- Tələblər icra edilməsə, sülh müstəvisində addım atmaq çətin olacaq. İndi isə erməni tərəfi müxtəlif istiqamətlərdə addımlar atmağa cəhd edir. Verilən fərqli bəyanatlar, aşağı səviyyədə edilən müraciətlər bunu təsdiq edir. Buna misal olaraq, Ermənistan parlamentinin Xarici əlaqələr daimi komitəsinin sədri Sərkis Xandanyanın Azərbaycan parlamentində analoji komitənin sədri kimi mənə müraciəti buna misaldır. Mən ona cavab vermişdim ki, ev tapşırıqlarını edin, sonra biz danışaq. Amma o yenə də yalan danışır. Çünki tələbləri yerinə yetirmədən danışmağın heç bir mənası yoxdur. Əslində, Ermənistanın ikiüzlü davranışları artıq digər qonşu dövlətləri də dilə gətririb. Bu yaxınlarda Rusiya tərəfi bəyanat verdi ki, Ermənistan eyni zamanda iki masada otura bilməyəcək. Çünki rəsmi İrəvan Avrasiya İttifaqının, Kollektiv Təhlükəsizlik Müqaviləsi Təşkilatının (KTMT) üzvü olduğu halda Avropa İttifaqına üzv olmaq üçün addımlar atmağa çalışır.

- Ermənistan parlamenti Avropa İttifaqına üzvlüklə bağlı qərar çıxarıb. Bu rəsmi İrəvanın digər öhdəlikləri fonunda nə dərəcədə məntiqli bir qərardır?

- Əslində, burada da bir paradoks var ki, Ermənistan Rusiyanın moderatorluq etdiyi təşkilatların üzvü olduğu halda, Avropa İttifaqına üzvlüklə bağlı qərar çıxarır. Bununla bağlı Ermənistan parlamentinin müvafiq qərarı var. Bu isə sırf erməni xisləti ilə bağlı bir amildir. Keçmiş SSRİ Nazirlər Soveti sədrinin birinci müavini işləmiş Anastas Mikoyanın (1955-1964) ailəsində çoxlu sayda qardaş-bacılar var idi. Onlardan biri kommunistlərlə, digəri müxalifətlə, başqası isə bitərəflərlə, xaricdəki qüvvələrlə işləyirdi. Ona görə də bu ermənilərin köhnə adətidir. Onlar həmişə haradansa mümkün münasibət axtarışındadır. İndi də bu hiyləgərlik özünü daha qabarıq şəkildə göstərir ki, Rusiya ilə eyni İttifaqda olduğu halda Avropa İttifaqına “gəlirəm” deyirlər. Təəssüf ki, bu ermənilərə xas bir xarakterdir.