BAKI, 20 oktyabr. TELEQRAF
Almaniyanın əczaçılıq və texnologiya konserni “Merck” nadir xəstəliklərin müalicəsi üçün dərman portfelini genişləndirmək məqsədilə Britaniyanın “Silence Therapeutics” biotexnologiya şirkətini satın alacaq.
Teleqraf xəbər verir ki, bu barədə “Merck” şirkətinin mətbuat xidməti məlumat yayıb.
Razılaşmaya əsasən, Almaniya konserni “Silence Therapeutics”in hər bir Amerika depozitar səhmi üçün 20 dollar ödəyəcək. Sövdələşmənin ümumi dəyəri 1,1 milyard dollar (təxminən 980 milyon avro) qiymətləndirilir.
Təklif olunan məbləğ Britaniya şirkətinin səhmlərinin son 30 gündəki orta qiymətindən 82 faiz yüksəkdir.
Sövdələşmə artıq “Silence Therapeutics” rəhbərliyi tərəfindən təsdiqlənib. Prosesin 2027-ci ilin birinci rübündə yekunlaşacağı gözlənilir. Alış yeni kredit xətləri hesabına maliyyələşdiriləcək.
“Merck”in İdarə Heyətinin üzvü Kay Bekman bildirib ki, bu satınalma şirkətin elmi-tədqiqat imkanlarını genişləndirəcək və nadir xəstəliklərdən əziyyət çəkən pasiyentlər üçün hədəflənmiş müalicə üsullarının inkişafına şərait yaradacaq.
Britaniya şirkətinin əsas aktivlərindən biri “Divesiran” preparatıdır. Kiçik interferensiya edən RNT (siRNA) texnologiyası əsasında hazırlanan dərman hazırda klinik sınaqların üçüncü və yekun mərhələsinə keçidə hazırlanır.
Preparat qırmızı qan hüceyrələrinin həddindən artıq istehsalı ilə xarakterizə olunan nadir qan xərçəngi növünün – həqiqi polisitemiyanın müalicəsi üçün nəzərdə tutulub.
“Merck”in əczaçılıq bölməsinin rəhbəri Denni Bar-Zohar bildirib ki, bu satınalma konsernin innovativ ixtisaslaşmış dərmanlar sahəsində qlobal liderlərdən birinə çevrilmək məqsədinə xidmət edir.
Qeyd edək ki, “Merck” son dövrlərdə iri satınalmalar vasitəsilə fəaliyyətini genişləndirir. Şirkət 2026-cı ilin iyununda ABŞ-nin “Bio-Techne” şirkətini 10 milyard avroya almaq barədə razılaşma elan edib. Bundan əvvəl isə nadir şiş xəstəliklərinin müalicəsi sahəsində mövqeyini gücləndirmək üçün “SpringWorks” onkologiya şirkətini satın alıb.
