İsrailin xarici işlər naziri Gideon Saar bildirib ki, Londonun İordan çayının qərb sahilindəki İsrail yaşayış məntəqələrinə sanksiyalar tətbiq etmək qərarından sonra İsrail Böyük Britaniyaya qarşı bir sıra cavab tədbirləri görüb.
Teleqraf xəbər verir ki, bu barədə “The Times of Israel” qəzeti məlumat yayıb.
Saar qeyd edib ki, Baş nazir Binyamin Netanyahu və Xarici İşlər Nazirliyi Qüdsdəki Britaniya konsulluğunu bağlamaq, ABŞ tərəfindən dəstəklənən Kiryat Gatdakı Qəzza üçün Beynəlxalq Dəstək Mərkəzindən Britaniya nümayəndələrini geri çağırmaq və Fələstin Muxtariyyətinin təhlükəsizlik qüvvələrinə təlim verən Britaniya dəstək qrupunun Ramallahdakı işini dayandırmaq qərarına gəliblər.
Bundan əlavə, İsrail "antisemit və anti-İsrail fəaliyyətinə görə" 12 Britaniya siyasətçisinin ölkəyə girişini qadağan edəcək.
İsrail Xarici İşlər Nazirliyinin rəhbəri Britaniya xarici işlər naziri Ed Milibandın İsrailə qarşı ittihamlarını "qəddar və yalan" adlandırıb. Saarın sözlərinə görə, Londonun sanksiyaları daxili siyasi mülahizələrlə diktə olunur və qarşıdan gələn Leyboristlər Partiyasının konfransı ilə bağlıdır.
Saar hazırkı Britaniya hökumətini "düşmən" adlandırıb və onu İsrailə qarşı koordinasiyalı hərəkətlərdə ittiham edib.
Saar həmçinin bildirib ki, Britaniya sanksiyaları və Londonun İsrailə tətbiq etdiyi digər məhdudlaşdırıcı tədbirlər xaricdə antisemitizmin artmasına səbəb olur.
