BAKI, 4 sentyabr. TELEQRAF

ABŞ vitse-prezidenti Cey Di Vens Vaşinqtonun İranla qarşıdurmanı noyabrda keçiriləcək aralıq seçkilərinə qədər başa çatdırıb-çatdırmayacağına aydınlıq gətirməyib.

Teleqraf xəbər verir ki, Vens bunu Ağ Evdə jurnalistlər üçün keçirdiyi brifinqdə bildirib.

“Bizim mövqeyimiz ondan ibarətdir ki, süni son tarix müəyyən etməyəcəyik”, – vitse-prezident deyib.

Vens hazırkı vəziyyəti müharibə adlandırmağın düzgün olmadığını bildirib. Onun sözlərinə görə, hazırda aktiv atışma getmir, genişmiqyaslı hərbi əməliyyatlar isə təxminən altı həftə davam edib.

ABŞ vitse-prezidenti bundan sonrakı vəziyyətin İranın gəmilərə hücumları nə vaxt dayandıracağından asılı olduğunu söyləyib: “Bu sualın cavabını bilmirəm. Bunu iranlılardan soruşmaq lazımdır”.

Vens həmçinin ABŞ-ın hərəkətlərinin kommersiya gəmiçiliyinin təhlükəsizliyini təmin etdiyini və qlobal enerji böhranının qarşısını aldığını iddia edib. Onun sözlərinə görə, Vaşinqtonun əsas məqsədlərindən biri İranın nüvə başlığı əldə etməsinə imkan verməməkdir.

Vitse-prezident İranla qarşıdurma fonunda bahalaşan benzinin ABŞ-da nə vaxt yenidən bir qallon üçün 3 dollar səviyyəsinə enəcəyi barədə də proqnoz verməyib.