BAKI, 3 sentyabr. TELEQRAF

"Onlar Rusiyada həqiqətən də əsəbidirlər".

Teleqraf xəbər verir ki, bu barədə erməni mediasına müsahibəsində politoloq Aleksandr İsgəndəryan deyib.

Onun sözlərinə görə, Ermənistan-Rusiya münasibətləri açıq-aşkar yaxşı dövrlərini yaşamır.

“Bu böhran hələ bitməyib, üstəlik, dərinləşməkdə davam edir. Aydındır ki, rəsmi İrəvan seçkilərdən sonra vəziyyəti birtəhər həll etməyə ümid edirdi”, - deyə İsgəndəryan qeyd edib.

Ekspertin sözlərinə görə, nədənsə İrəvanda Moskva ilə ziddiyyətlərin daha çox şifahi və müzakirə xarakteri daşıdığı təəssüratı yaranıb. Lakin münasibətləri normallaşdırmaq mümkün olmayıb.

“Düşünürəm ki, münasibətlər problemli olaraq qalacaq. Ümumiyyətlə, bu münasibətlərin yenidən qurulması gedir. Bu, qlobal bir prosesdir və yalnız Ermənistana aid deyil. Bütün bunların səbəbləri çox dərindir. Cənubi Qafqazdan danışırıqsa, onlar 2020-ci il müharibəsində gizlənib. Təkrar edirəm, bu, yalnız Ermənistana aid deyil. Rusiya-Azərbaycan münasibətlərində baş verənlərə nəzər salmaq kifayətdir: bu, təxminən eyni prosesdir”, - deyə politoloq vurğulayıb və əlavə edib ki, problem yalnız danışıqlar və müzakirələrlə həll olunmayacaq.

O əmindir ki, Nikol Paşinyan Avropaya inteqrasiya ideyasından imtina etsə belə, yenə də əhəmiyyətli dəyişikliklər olmayacaq.