BAKI, 3 sentyabr. TELEQRAF

Çin hakimiyyəti Vaşinqtonun Tehrana qarşı elan etdiyi iqtisadi müharibə ilə bağlı ABŞ-nin bir neçə sorğusuna cavab verib.

Teleqraf xəbər verir ki, bu fikirləri ABŞ-nin vitse-prezidenti J.D. Vens Ağ Evdə jurnalistlər üçün keçirilən brifinqdə səsləndirib.

Ondan ABŞ Prezidenti Donald Trampın Çin banklarının İrana maliyyə xidmətləri göstərməməsini tələb etmək üçün birbaşa Çin rəhbəri Si Cinpinə müraciət edib-etmədiyi soruşulub.

"Çinlə bir sıra söhbətlər apardıq və açığı, inanıram ki, Çin bəzi sorğularımıza cavab verib. Prezidentin Si Cinpinlə birbaşa danışıb-danışmadığını bilmirəm, amma sonra öyrənib sizə xəbər verəcəyik", - deyə vitse-prezident bildirib.

İranın təcridindən danışan Vens qeyd edib ki, Çin bu məsələdə əməkdaşlıq etməyə hazırdır və bunu hamı bilir.

"Mən demirəm ki, onlar (Çin -red.) bizdən xahiş etdiyimiz hər şeyi edirlər, amma inanıram ki, Çin, İrandan daha məsuliyyətli davranır. Amma bu, təkcə Çin deyil. Bəzən onlar bu barədə açıq danışmağa hazır deyillər, amma pərdəarxası İranın ticarət gəmilərinə atəş açdığına görə cəzalandırılmasını təmin etmək üçün bir çox yaxşı işlər görürlər", - Vens deyib.