BAKI, 8 mart. TELEQRAF

Venesuela hökuməti ABŞ ilə qarşılıqlı hörmət və beynəlxalq hüquq prinsiplərinə əsaslanan uzunmüddətli münasibətlər inkişaf etdirməyə hazır olduğunu bildirib.

Teleqraf xəbər verir ki, bu barədə Venesuela prezidentinin səlahiyyətli nümayəndəsi Delsi Rodrigez “Telegram” kanalında paylaşım edib.

Rodrigez qeyd edib ki, Karakas Vaşinqtonla iki ölkənin xalqlarının rifahına xidmət edəcək əməkdaşlığı inkişaf etdirmək niyyətindədir.

“Biz qarşılıqlı hörmətə, bərabərliyə və beynəlxalq hüquqa əsaslanan uzunmüddətli münasibətlər qurmağa hazır olduğumuzu bir daha bəyan edirik. Məqsəd hər iki ölkənin xeyrinə əməkdaşlığı gücləndirəcək iş gündəliyini irəli aparmaqdır”, - deyə o bildirib.

Rodrigez əlavə edib ki, ABŞ Prezidenti Donald Trampın Vaşinqtonun Venesuela hökumətini rəsmi və hüquqi şəkildə tanıdığı barədə açıqlaması Karakas tərəfindən ölkə və onun xalqı ilə bağlı həqiqətin qəbul edilməsi kimi qiymətləndirilir.

Onun sözlərinə görə, Venesuela ilə ABŞ arasında diplomatik dialoq mövcud fikir ayrılıqlarının aradan qaldırılması və iki ölkənin mövqelərinin üst-üstə düşdüyü məsələlərdə irəliləyiş əldə olunması üçün vacib vasitədir.