BAKI, 5 dekabr. TELEQRAF

ABŞ Silahlı Qüvvələri narkotik qaçaqmalçılığı ilə mübarizə əməliyyatı çərçivəsində daha bir hədəfə hava zərbəsi endirib. ABŞ Cənub Qüvvələri (Southern Command) bildirib ki, son hücum nəticəsində 4 nəfər həlak olub. Bununla sentyabrdan bəri əməliyyatlarda ölənlərin ümumi sayı ən azı 87 nəfərə çatıb.

Teleqraf xəbər verir ki, son zərbə, ABŞ-nin keçirdiyi ikinci oxşar əməliyyatla bağlı yaranan mübahisələr fonunda həyata keçirilib. Öncəki hücumlarda hədəfə alınan qayığın narkotik daşıdığı iddia olunsa da, zərbənin qanuniliyi, hədəfin dəqiq müəyyən edilib-edilməməsi və mülki şəxslərin həlak olub-olmaması ətrafında suallar yaranmışdı.

Southern Command-ın açıqlamasında deyilir: “Əməliyyat beynəlxalq hüquqa uyğun olaraq həyata keçirilib. Regionda narkotik şəbəkələrinin fəaliyyətini məhdudlaşdırmaq və təhlükəsizlik risklərini azaltmaq məqsədi daşıyır.”

Hadisə ilə bağlı əlavə detallar açıqlanmayıb.

Vaşinqtonda və beynəlxalq mediada ABŞ-nin son aylarda Karib hövzəsində və Mərkəzi Amerika sularında həyata keçirdiyi zərbələrin şəffaflığı, hədəfin müəyyənləşdirilməsi kriteriyaları və ölənlərin statusu barədə müzakirələr davam edir.