BAKI, 28 iyul. TELEQRAF

Dövlət Sərhəd Xidmətinin (DSX) Göytəpə şəhərində yerləşən hərbi hissəsində Dini Qurumlarla İş üzrə Dövlət Komitəsi (DQİDK) ilə birgə “Dini radikalizmin fəsadları və ona qarşı mübarizə” mövzusunda maarifləndirici tədbir keçirilib.

Bu barədə Teleqraf-a DSX-dən məlumat verilib.

DSX-nin şəxsi heyəti, Dini Qurumlarla İş üzrə Dövlət Komitəsinin nümayəndəsi və din xadiminin iştirakı ilə keçirilən tədbirdə əvvəlcə Dövlət Himni səsləndirilib, Ulu Öndər Heydər Əliyevin və ərazi bütövlüyü uğrunda canlarını fəda etmiş şəhidlərin xatirəsi bir dəqiqəlik sükutla yad edilib.

Daha sonra tədbirin keçirilməsinin əsas məqsədi barədə danışılıb, şəxsi heyətə dini radikalizmin mahiyyəti izah edilib, onun milli təhlükəsizliyə və ictimai sabitliyə törətdiyi təhlükələr diqqətə çatdırılıb, eləcə də gənc hərbi qulluqçular arasında radikal təsirlərə qarşı maarifləndirmə işlərinin gücləndirilməsinin vacibliyi vurğulanıb.

Çıxış edənlər vətənpərvərliyin, milli-mənəvi dəyərlərə sədaqətin, xalqa, dövlətə və Ali Baş Komandana bağlılıq prinsiplərinin Dövlət Sərhəd Xidmətində əsas prioritet olduğunu bildirilib.

Dini Qurumlarla İş üzrə Dövlət Komitəsinin nümayəndəsi çıxış edərək dini radikalizmin yaranma səbəbləri, xarici təsirlər və bu meyillərə qarşı aparılan dövlət siyasəti barədə geniş məlumat verilib. Qeyd olunub ki, Azərbaycan dünyəvi və tolerant dəyərləri ilə tanınan bir ölkədir və ölkəmizdə din dövlətdən ayrı olsa da, dinə, dini dəyərlərə yüksək hörmət göstərilir. Lakin bəzi xarici dairələr bu həssas sahədən sui-istifadə edərək radikal düşüncələri yaymağa çalışır və xüsusilə gəncləri hədəf seçirlər. Radikal ideologiyaların yayılması yalnız dini deyil, həm də ictimai sabitliyi pozmağa yönəlmiş təhlükəli tendensiyalardır, onlara qarşı həm hüquqi, həm də mənəvi mübarizə vacibdir.

Yerli din xadimi dini radikalizmin İslam dini ilə heç bir əlaqəsinin olmadığını vurğulıb, əsl İslamın dinc, ədalətli və mərhəmətli bir din olmaqla, zorakılığı, nifrəti və cəmiyyətə qarşı çıxmağı qəti şəkildə rədd etdiyini qeyd edilib. İlahiyyatçı eyni zamanda gəncləri düzgün dini biliklərə yiyələnməyə, etibarlı mənbələrdən məlumat almağa və dini fanatizmə qarşı ayıq-sayıq olmağa çağırıb.

Tədbirin sonunda mövzu ətrafında fikir mübadiləsi aparılmış, şəxsi heyəti maraqlandıran suallar cavablandırılıb.