BAKI, 4 iyun. TELEQRAF

“İran son müharibədən sonra xeyli zəifləyib, buna görə də ABŞ tələsik nüvə razılaşmasına nail olmaq üçün Tehrana güzəştə getməməlidir”.

Teleqraf xəbər verir ki, bunu ABŞ-nin keçmiş dövlət katibi Kondoliza Rays deyib.

O bildirib ki, bu müharibə İranda hakimiyyət dəyişikliyinə səbəb olmasa da, Tehranın hərbi, regional və nüvə potensialını ciddi şəkildə zəiflədib və daha sabit Yaxın Şərqin formalaşmasına yol açıb.

Raysın sözlərinə görə, İran ordusuna, raket ehtiyatlarına və proksi şəbəkəsinə dəyən ziyan Tehranın regiondakı mövqelərini zəiflədib, ABŞ, İsrail və ərəb dövlətləri arasında hərbi əməkdaşlıq isə güclənib.

ABŞ-nin keçmiş dövlət katibi bu müharibənin İranın nüvə proqramını illərlə geri saldığını və Tehranın uzun müddət nüvə silahı əldə etməsini qeyri-mümkün etdiyini yazıb.

Rays xəbərdarlıq edib ki, Vaşinqton potensial danışıqlarda dondurulmuş İran aktivlərini sərbəst buraxmamalı və ya Tehranı sanksiyalardan azad etməməlidir: “Çünki İran həmişə azad edilmiş resurslardan öz hərbi və proksi qüvvələrini bərpa etmək üçün istifadə edib. Buna görə də, razılaşmanın olmaması pis razılaşmanı qəbul etməkdən daha yaxşıdır”.

O əlavə edib ki, ABŞ indi İranı zəif durumda saxlamaq, nüvə silahı əldə etməsinin qarşısını almaq və Yaxın Şərqdə daha sabit nizam yaratmaq üçün nadir ələ düşən fürsətə malikdir.