BAKI, 23 oktyabr. TELEQRAF

"Azərbaycan və Türkiyə münasibətləri təkcə iki dövlət arasında formalaşmış strateji tərəfdaşlıq deyil, həm də ortaq tarixə, milli-mənəvi dəyərlərə, qarşılıqlı etimada və xalqlarımızın qardaşlıq iradəsinə söykənən xüsusi münasibətlər modelidir. Bu münasibətlərin möhkəmlənməsində Prezident cənab İlham Əliyev və Türkiyə Prezidenti cənab Rəcəb Tayyib Ərdoğan arasında formalaşmış siyasi dialoq və qarşılıqlı etimad müstəsna əhəmiyyət daşıyır".

Teleqraf xəbər verir ki, bu fikirlər deputat Mehriban Vəliyevaya məxsusdur.

Onun sözlərinə görə, liderlər arasında baş tutan telefon danışığının müsbət ruhda keçməsi də bir daha göstərdi ki, Azərbaycan-Türkiyə münasibətlərinin əsas dayaqlarından biri məhz dövlət başçıları arasındakı səmimi dialoq, qarşılıqlı hörmət və strateji baxışların uzlaşmasıdır: "Lakin baş verən hadisələrə yalnız liderlər arasındakı telefon danışığının nəticələri prizmasından yanaşmaq düzgün olmazdı. Sentyabrın sonlarından etibarən Türkiyədə Azərbaycana qarşı müşahidə olunan, zaman keçdikcə genişlənən və ictimai müzakirələrdə gərginlik yaradan kampaniya ciddi təhlil tələb edir. Azərbaycan dövlətinə, xalqımıza və ölkə rəhbərliyinə qarşı səsləndirilən təhqiramiz ifadələr, eləcə də Ankarada və İstanbulda Azərbaycanın diplomatik nümayəndəlikləri qarşısında təşkil olunduğu bildirilən aksiyalar iki ölkə arasındakı münasibətlərin ruhuna və diplomatik etika prinsiplərinə ziddir. Fərqli siyasi mövqelərin mövcudluğu, ayrı-ayrı məsələlərə müxtəlif yanaşmaların sərgilənməsi siyasi həyatın təbii elementidir. Ancaq siyasi fikir ayrılığı ilə bütöv bir xalqa, dövlətə və onun legitim rəhbərliyinə qarşı təhqiramiz münasibət arasında aydın sərhəd var. Tənqid siyasi müzakirənin legitim formasıdır, təhqir və düşmənçilik mühiti yaratmaq isə nə sağlam siyasi dialoqa, nə də qardaşlıq münasibətlərinə xidmət edir. Bu baxımdan, Türkiyədə Azərbaycana qarşı aparılan kampaniyanın hansı siyasi dairələrin təşəbbüsü ilə formalaşması, kimlər tərəfindən təşkil edilməsi və hansı məqsədlərə xidmət etməsi obyektiv araşdırılmalıdır. Əgər ayrı-ayrı siyasi qruplar və onların ətrafında fəaliyyət göstərən şəxslər Azərbaycan-Türkiyə münasibətlərinə zərər vuran ritorikanı məqsədli şəkildə təşviq ediblərsə, bu davranış siyasi məsuliyyət və ictimai qiymətləndirmə baxımından ciddi suallar doğurur. Xüsusilə vurğulamaq lazımdır ki, ayrı-ayrı şəxslərin və qrupların mövqeyini bütövlükdə Türkiyə dövlətinin və ya türk xalqının münasibəti kimi təqdim etmək doğru deyil".

Deputat bildirib ki, Türkiyə cəmiyyəti müxtəlif siyasi baxışlara malik milyonlarla insandan ibarətdir: "Azərbaycana qarşı səsləndirilən qəbuledilməz fikirləri bütün Türkiyəyə şamil etmək nə ədalətli yanaşmadır, nə də iki qardaş xalqın maraqlarına uyğundur. Eyni zamanda, qardaşlıq münasibətlərinin qorunması naminə baş verənləri görməzdən gəlmək və ya onların siyasi nəticələrini kiçiltmək də düzgün olmazdı. Məsələnin digər mühüm tərəfi Türkiyədə hakim Ədalət və İnkişaf Partiyasının (AKP) daxilində və onun siyasi çevrəsində yer alan ayrı-ayrı şəxslərin bu prosesdə mümkün roludur. Əgər hakim partiyaya yaxın siyasi şəbəkələrdən kimlərsə Azərbaycana qarşı kampaniyanın təşkilində və ya onun genişləndirilməsində iştirak ediblərsə, bu məsələyə siyasi məsuliyyət müstəvisində yanaşılmalıdır. Hakim siyasi qüvvəyə yaxınlıq heç kimə başqa bir dövlətin suverenliyinə, xalqının ləyaqətinə və rəhbərliyinə qarşı təhqiramiz kampaniya aparmaq imtiyazı vermir. Bu kontekstdə adıçəkilən Saral və kampaniyanın digər iştirakçıları ilə bağlı məsələlər də emosional ittihamlar deyil, konkret açıqlamalar, faktlar və ictimaiyyətə təqdim edilə bilən dəlillər əsasında qiymətləndirilməlidir. Kimlərin hansı çağırışları səsləndirdiyi, aksiyaların təşkilində hansı rol oynadığı, siyasi əlaqələrindən necə istifadə etdiyi və bu fəaliyyətin hansı nəticələr doğurduğu aydınlaşdırılmalıdır. Belə yanaşma həm tənqidin əsaslı olmasını təmin edər, həm də məsələnin şəxsi qarşıdurma səviyyəsinə endirilməsinin qarşısını alar. Azərbaycanın mövqeyi prinsipial və aydındır: ölkəmiz Türkiyə ilə münasibətlərin strateji mahiyyətinə xələl gətirən hər hansı cəhdə biganə qala bilməz. Bununla yanaşı, Azərbaycanın dövlətçilik ənənələri və xarici siyasət yanaşması emosional reaksiyalardan daha çox siyasi uzaqgörənliyə, milli maraqların qorunmasına və diplomatik kanalların effektiv istifadəsinə əsaslanır. Məhz buna görə də belə hallarda həm prinsipial mövqe nümayiş etdirmək, həm də dövlətlərarası dialoqu qorumaq vacibdir. Telefon danışığının müsbət məzmunu Azərbaycan və Türkiyə liderlərinin münasibətlərin strateji əhəmiyyətini dərindən dərk etdiklərini göstərir".