BAKI, 4 aprel. TELEQRAF

Milli Məclisin Əmək və sosial siyasət komitəsinin sədri, Yeni Azərbaycan Partiyasının İdarə Heyətinin üzvü Musa Quliyev Teleqraf-ın suallarını cavablandırıb.

Onunla müsahibəni təqdim edirik:

- Musa müəllim, son zamanlar efir dili, mədəniyyəti ilə bağlı tənqidi fikirlər səslənir. Siyasətçilərin buna baxışı necədir?

- Ümumiyyətlə, efir dili və mədəniyyəti bir-biri ilə sıx əlaqəsi olsa da, fərqli anlayışlardır. Ola bilər ki, efir dili, leksikonu çox təmiz olsun, amma davranış tamamilə fərqli ola bilər. Eyni zamanda normal davranış fonunda çıxış çox pinti, çirkli, məntiqsiz olar. Azərbaycanda ümumilikdə efir mədəniyyəti ilə bağlı yanaşma heç də birmənalı deyil. Bəzi televiziya aparıcıları, ekspertlər, şou təqdimatçıları, ümumiyyətlə, heç bir tənqidə və müzakirəyə belə layiq deyillər.

- Siyasi leksikon necə olmalıdır? Buna aid kriteriyalar varmı?

- Hazırda ölkəmizdə siyasətçilərin davranışları və onların efir dili kifayət qədər məqbul sayıla bilər. Sözsüz ki, müxalifət düşərgəsinin təmsilçilərindən bir-iki nəfəri çıxmaqla hər kəsin leksikonu normaldır. Bura iqtidar-müxalifət və müstəqil siyasi ekspertlərin də leksikonunu əlavə etmək olar. Siyasi mövzularda edilən çıxışları dinləyirəm və efirdə davranışlarına da diqqət edirəm. Bu baxımdan seçilən üslub, efir mədəniyyəti qaneedicidir. Sözsüz ki, hər kəsin öz ampulası, dünya görüşü, mədəniyyət və savad səviyyəsi var. Arzu edərdik ki, efirə çıxan şəxslərin hamısının nitqi, davranışı, leksikonu yüksək səviyyədə olsun.

- Sizi qane etməyən nədir?

- Bəzi siyasətçilər özlərinə aid olmayan mövzularla bağlı efirə çıxır. Eyni zamanda bir ekspert və ya siyasətçi müxtəlif mövzulara aid debatlara qatılır. Burada da onun artıq həmin sahədə piyada olduğu özünü açıq-aydın şəkildə göstərir. Belə debatların, müzakirlərin də faydası o qədər də olmur.

- Problemin kökündə nə dayanır?

- Görünür, ixtisaslaşma o qədər də geniş deyil. Bəzən deyirlər ki, siyasətçilər bütün siyasi mövzular haqqında bilməlidir və danışmalıdırlar. Bu da qüsurlu yanaşmadır. Çünki bilməlidir ayrı, danışmalıdır isə fərqli bir anlayışdır. 10 milyonluq xalqın qarşısında hansısa mövzunu müzakirə edərək, istənilən mövzuya rəy, qiymət vermək ayrı-ayrı anlayışlardır. Hər kəsdən də bu mövzuda tələb olunan odur ki, onlar daha yaxşı bildiyi mövzular ətrafında danışsınlar.

- Debat və müzakirələrdə əsasən nəyə diqqət etmək lazımdır?

- Burada əsas məqamlardan biri müzakirə və debatlar zamanı tərəf müqabilinə hörmət göstərməklə bağlıdır. Bu həm də tamaşaçıya olan hörmətlə izah olunur. Ona görə də siyasətçilərin efir mədəniyyəti və davranışı, dili, leksikonu aydın və normal olmalıdır. Amma bəzi nüanslar da nəzərə alınmalıdır.